राष्ट्रिय जनस्वास्थ्य प्रयोगशालाका अधिकृत घुससहित अख्तियारको नियन्त्रणमा

काठमाडौं—राष्ट्रिय जनस्वास्थ्य प्रयोगशाला टेकुमा कार्यरत एक जना अधिकृतलाई अख्तियार दुरुपयोग अनुसन्धान आयोगले घुससहित नियन्त्रणमा लिएको छ ।

अख्तियारका प्रवक्ता भोला दाहालले जनस्वास्थ्य प्रयोगशालामा कार्यरत मेडिकल ल्याब टेक्नोलोजिष्ट लेखनाथ भट्टराईलाई ५० हजार घुससहित शंखमुलबाट नियन्त्रणमा लिएको जानकारी दिए ।

उनी राष्ट्रिय जनस्वास्थ्य प्रयोगशालाका छैटौं तहका अधिकृत हुन् । भट्टराईले ल्याब दर्ता प्रक्रिया अगाडि बढाउन सहजीकरण गरिदिने भनी सेवाग्राहीसँग घुस मागेका थिए । उक्त सूचना पाएपछि अख्तियार दुरुपयोग अनुसन्धान आयोग टंगालबाट अनुसन्धान लागि टोली खटिएको थियो ।

प्रवक्ता दाहालकाअनुसार भट्टराईलाई सेवाग्राहीबाट ५० हजार रुपैयाँ घुस लिइसकेको अवस्थामा रकमसहित शंखमूलबाट पक्राउ गरिएको हो । उनीमाथि अख्तियारले थप अनुसन्धान जारी राखेको छ ।