प्रधानमन्त्रीको स्वास्थ्यबारे नबोल्न ग्राण्डीका चिकित्सकलाई निर्देशन

काठमाडौं–ग्राण्डी अस्पतालमा उपचारार्थ प्रधानमन्त्री केपी शर्मा ओलीको स्वास्थ्य अवस्थाबारे केही नबोल्न निर्देशन दिइएको छ । प्रधामन्त्रीको सचिवालय र उनका निजी चिकित्सक डा. दिब्या सिंह शाहले ग्राण्डीका चिकित्सकहरुलाई ओलीको स्वास्थ्यबारे केही नबोल्न निर्देशन दिएका हुन् ।

‘प्रधानमन्त्रीको स्वास्थ्य अवस्थाबारे हामीलाई केही बोल्न अनुमति दिइएको छैन । उहाँको अवस्थाबारे यहाँका डाक्टहरुलाई पनि थाहा छैन’ एक चिकित्सकले भने । उपचार भइरहेको ग्राण्डी अस्पतालको नवौ तलामा कसैलाई पनि जान दिइएको छैन ।

प्रधानमन्त्री ओलीको उपचारमा संलग्न चिकित्सकीय टोलीले दोस्रो पटक डायलाइसिस गर्ने तयारी थालेको छ । प्रधानमन्त्रीको रगतमा क्रियाटिनिनको स्तर सामान्यभन्दा निकै नै माथि छ र डायलाइसिस पछि पनि त्यो कम भएको छैन । प्रधानमन्त्रीलाई अहिले हल्का ज्वरो पनि आइरहेको बताइएको छ ।

अकस्मात बिरामी भएपछि प्रधानमन्त्री ओलीलाई बुधबार ग्राण्डी अस्पताल भर्ना गरिएको थियो ।