२०८१ असार ६, बुधबार
Health Aawaj logo
गृहपृष्ठसमाचारशववाहनमा पनि स्वास्थ्यमन्त्री बस्नेतको ‘राजनीतिक स्टन्ट’

शववाहनमा पनि स्वास्थ्यमन्त्री बस्नेतको ‘राजनीतिक स्टन्ट’

प्रदेश सरकारले खरिद गरेर हस्तान्तरण गरिसकेको शववाहन काठमाडौं झिकाएर पुनः हस्तान्तरण


काठमाडौं—स्वास्थ्य तथा जनसंख्यामन्त्री मोहनबहादुर बस्नेतमा अनौठो प्रचार मोह देखिन थालेको छ । नीतिगत कामहरु र ठूला योजनाहरुमा ध्यान दिनुपर्ने मन्त्री बस्नेत कहिले अस्पताल त कहिले फार्मेसी अनुगमनमा निस्केर प्रचारमोहमा रमाइरहेका छन् ।

यतिमात्रै होइन्, कहिले वर्षौदेखि नचल्न नसकेका भीभीआईपी र भीआईपी कक्ष थपेर त कहिले सरकारी अस्पतालमा सामान्य शैय्यामा निःशुल्क गरेर उल्कै प्रचार गरिरहेका छन्, उनी । तर, बढ्दो डेङ्गुको फैलिइरहेको महामारीप्रति उनको खासै रुचि र तदारुकता देखिन सकेको छैन ।

राजनीति स्टन्ट गर्न माहिर बस्नेतले गरेको एक त्यस्तै स्टन्ट अहिले सामाजिक सन्जालतिर चर्चाको विषय बनेको छ । प्रसंग हो—सिन्धुपाल्चोकको चौतारा अस्पताललाई उनले गरेको शववाहन हस्तान्तरणको ।

बागमती प्रदेश स्वास्थ्य मन्त्रालयले प्रदेशअन्तर्गतका अस्पतालका लागि ७ वटा शववाहन खरिद गरेको थियो । १४ साउनमा बागमती प्रदेशका स्वास्थ्यमन्त्री उत्तम जोशीले हेटौडामै उक्त शववाहनहरु ७ वटा प्रदेश अस्पताल विकास समितिका अध्यक्ष र मेडिकल सुपरिटेन्डेन्टहरुलाई हस्तान्तरण गरेका थिए ।

तर, मन्त्री बस्नेतलाई आफ्नो गृहजिल्लामा अरुले शववाहन हस्तान्तरण गरेको मन परेनछ । आफ्नो गृहजिल्लाका जनतालाई काम गरेको देखाउने उनको हुटहुटी शववाहनमा गएर पोखियो । मन्त्री बस्नेतले हस्तान्तरण गरिसकिएको शववाहनको साँचोसहित चौतारा अस्पतालका मेसु डा. त्रिभुवन झालाई काठमाडौं बोलाए ।

संघीय स्वास्थ्य तथा जनसंख्या मन्त्रालयमा १६ साउनमा पुनः शववाहनको साँचो डा. झालाई हस्तान्तरण गरे । त्यसलाई फोटो खिचेर उनका सहयोगीहरुले फेसबुकमा राखेपछि यस विषयमा सामाजिक सन्जालमा प्रयोगकर्तामाझ राम्रै चर्चा बटुलिरहेको छ ।

यो शैली अपनाएका पुनः शववाहन हस्तान्तरण गरेका थिए—बागमती प्रदेशका आर्थिक मामिला बहादुर सिंह लामाले । १४ साउनमै स्वास्थ्यमन्त्री जोशीले त्रिशुली अस्पतालमा मेडिकल सुपरिटेन्डेन्ट डा. प्रतीक सिंहलाई हस्तान्तरण गरिसकेको शववाहन लामाले आफ्नो मन्त्रालयमा बोलाएर पुनः हस्तान्तरण गरेको नाटक गरे ।

प्रदेश सरकारले चितवनको बहुलहर रत्नगर अस्पताल, दोलखा अस्पताल, चौतारा अस्पताल, सिन्धुली अस्पताल, रामेछाप अस्पताल र त्रिशुली अस्पताललाई शववाहन खरिद गरेर हस्तान्तरण गरेको थियो ।


क्याटेगोरी : समाचार



तपाईको प्रतिक्रिया दिनुहोस


ट्रेण्डिङ