काठमाडौं—चितवन मेडिकल कलेजमा एमबीबीएस पढ्दैं गरेका एक जना विद्यार्थीलाई प्रहरीले पक्राउ गरेको छ । बिहीबार राति नेपाल प्रहरीको केन्द्रीय अनुसन्धान ब्यूरो (सिआईबी)ले नक्कली प्रमाणपत्र पेश गरेर एमबीबीएस पढ्दैं गरेको आरोपमा पक्राउ गरेको हो ।
‘हामीले छानविनका लागि चितवन मेडिकल कलेजबाट एक जनालाई पक्राउ गरेका छौं,’ सिआईबीका प्रवक्ता सन्जयसिंह थापाले हेल्थआवाजसँग भने, ‘काठमाडौं ल्याइदैंछ । अनुसन्धानपछि थप विवरणहरु सार्वजनिक गर्छौ ।’
यसअघि नक्कली प्रमाणपत्र बुझाएर एमबीबीएस पढेकाहरुलाई पक्राउ गर्ने क्रममा एक जना सक्कली चिकित्सक नै पक्राउ परेपछि सिआईबी सचेत बनेको छ । त्यसकारण सबै अनुसन्धानपछि मात्रै पक्राउका विवरणहरु सार्वजनिक गर्ने उसको तयारी छ ।
सिआईबीले अप्रेशन ‘फोक्सट्रोट चार्ली’ चलाएर नक्कली सर्टिफिकेटधारी डाक्टरहरुमाथि छानविन गरिरहेको छ । जसमा यसअघि ८ जनालाई पक्राउ गरिएको थियो । त्यसमध्ये सांसद सुनिल शर्मा अदालतबाट तारेखमा छुटिसकेका छन् भने एक जना सक्कली चिकित्सक भुलबस पक्राउ परेका कारण रिहा भइसकेका छन् ।
अन्य ६ जनालाई भने प्रहरीले हिरासतमा राखेर अनुसन्धान जारी राखेको छ ।
