काठमाडौं– डेंङ्गीको संक्रमण पछिल्लो समय भयावह बन्दै गएको पाइएको छ । नौ महिना यता देशभरका करिब २८ हजार जनामा डेंङ्गी संक्रमण भएको छ ।
इपिडिमियोलोजी तथा रोग नियन्त्रण महाशाखा (इडिसिडी)ले गत आइतबार सार्वजनिक गरेको रिपोर्टकाअनुसार सन् २०२३ जनावरी (२०७९ पौष) देखि १७ सेप्टम्बर (२०८० भदौ ३१) सम्ममा २७ हजार ९६८ जनामा डेंङ्गु संक्रमण भएको छ । भने यस अवधिमा १५ जनाले ज्यान गुमाएका छन् ।
महाशाखाका अनुसार सबैभन्दा बढी कोशी प्रदेशमा डेंङ्गी संक्रमण फैलिएको छ । जसमा कुल संक्रमितको ७४.८ प्रतिशत अर्थात २० हजार ९२४ जना र बागमतिमा १५ प्रतिशत अर्थात ४ हजार २४६ जनामा संक्रमण पुष्टि भएको छ ।
त्यस्तै मधेश प्रदेशमा २ प्रतिशत, गण्डकीमा ३ प्रतिशत, लुम्बिनीमा १.७ प्रतिशत, कर्णलीमा ०.३ प्रतिशत र शुदुरपश्चिममा २.९ प्रतिशतलाई डेंङ्गी संक्रमण भएको छ ।
डेंङ्गुबाट १० वटा जिल्ला बढी प्रभावित भएका छन् । सबैभन्दा बढी प्रभावित हुने जिल्ला सुनसरी रहेको छ । जसमा हालसम्म १५ हजार ८८१ जना संक्रमित भएका छन् । त्यसैगरी धादिङमा २ हजार ९९२, मोरङमा २ हजार २६१, झापामा १ हजार ३९४ र क्रमश काठमाडौं, शंखुवासभा, धकुटा, धनुषा, कैलाली र तनहु रहेका छन् ।
