काठमाडौं—सत्ता गठबन्धनमा भत्किएर नयाँ गठबन्धन बनेर बर्खास्तीमा पर्न लागेका स्वास्थ्य तथा जनसंख्या मन्त्री मोहनबहादुर बस्नेत विहानै स्वास्थ्य मन्त्रालयमा पुगेका छन् । आइतबार रातभर विकसित घटनाक्रमअनुसार सोमबार नयाँ गठबन्धनको तयारी अन्तिम चरणमा छ ।
तर, स्वास्थ्य मन्त्री मोहनबहादुर बस्नेत ब्याक डेटमा गुणस्तर मापन तथा नियमन महाशाखा प्रमुख डा. मदन उपाध्याय र नीति योजना महाशाखा प्रमुख डा. कृष्ण पौडेलको सरुवा फाइल उठाउन कर्मचारीलाई दबाब दिइरहेका छन् ।
टेरामक्स प्रकरणमा मुछिएर चर्को राजीनामा दबाब खेपिरहेका उनलाई सत्तागठबन्धन परिवर्तनले सत्ता बहिगर्मन सहज बनाइदिएको छ । यद्यपी, मन्त्री बस्नेत ब्याक डेटमा केही सरुवाहरु तथा महत्वका निर्णयहरु गर्नका लागि सोमबार विहानै मन्त्रालय पुगेका हुन् । तर, मन्त्री दबाबकाबीच मन्त्रालय उच्च अधिकारीहरुको भागभाग भएको स्वास्थ्य मन्त्रालय स्रोतको दावी छ ।
स्वास्थ्य सचिव डा. रोशन पोखरेल बिदामा भएपछि मन्त्री बस्नेतले अतिरिक्त स्वास्थ्य सचिवहरुलाई निर्णयका लागि दबाब दिइरहेका छन् । तर, उनको दबाब अतिरिक्त सचिवहरुले कति थेग्ने हुने यसै भन्न सकिने अवस्था नरहेको स्वास्थ्य स्रोत बताउँछ ।
‘मन्त्रीज्यू विहानै मन्त्रालयमा आउनु भएको छ । उहाँले केही उच्च तहका अधिकारीहरुको सरुवा गर्न खोज्नुभएको छ,’ मन्त्रालय स्रोतले भन्यो, ‘तर, अतिरिक्त सचिवसहितका उच्च अधिकारीहरुको भागभाग छ ।’
भर्खरै सहसचिवमा बढुवा जयबहादुर भण्डारीको मन्त्रालयमा पदस्थापना भइसकेको छैन । जसका कारण मन्त्रालयको प्रशासनमा आएर फाइल उठाउन कानुनी प्रश्न जन्मने भएकाले उनले त्यो आँट गरेका छैनन् ।
(*यसअघि स्वास्थ्य सचिव डा. पोखरेल दुई दिन विदामा भन्ने खबर गलत पर्न गएकाले सच्चाइएको छ । सं.)
