काठमाडौं–स्वास्थ्य सेवा विभागले पाठेघरको क्यान्सर विरुद्धको एचपिभी खोपको खेप प्रमाणीकरण खोप उत्पादन गरेको देश गरिएको प्रष्टीकरण दिएको छ । बिहिबार हेल्थआवाजले प्रकाशन गरेको ‘खेप प्रमाणिकरण नै नगरी १४ लाख २८ हजार किशोरीमा एचपिभी खोप’ शीर्षकको समाचारमा चासो व्यक्त गर्दै विभागको परिवार कल्याण महाशाखाले प्रष्टीकरण दिएको हो ।
महाशाखाले हेल्थआवाजलाई पठाएको जानकारी पत्रमा २२ माघबाट देशब्यापी रुपमा सुरु भएको एचपिभी खोपको खेप (लट रिलिज) प्रमाणीकरण खोप उत्पादन गरेको देशको नियांमक निकायबाट जारी भएको उल्लेख छ ।
साथै, डब्लुएचओ टेक्निकल रिपोर्ट सिरिज ९७८ एक्सपोर्ट कमिटी अन वायलोजिकल स्ट्यार्ण्डराइजेसन ६१ औं रिपोर्ट २०१३ मा युएन एजेन्सीले सप्लाई गरेको खोपको आयात हुने देशले लट रिलिज प्रमाणीकरण गर्नुनपर्ने दावी गरिएको छ ।
महाशाखाले पठाएको पत्रमा औषधि ऐन, २०३५, खोप ऐन, २०७२ तथा खोप नियमावली, २०७४ अनुसार नेपालमा एचपिभी खोप आपूर्ति र प्रयोग भएको उल्लेख छ ।
त्यसैगरी, नेपाल राष्ट्रिय खोप कार्यक्रममा समावेस हुने सबै खोपको लट नम्बर र म्याद गुज्रिने मिति समेत हरेक खोपको लेभलमा लेखिएको हुने र खोप लगाइसकेपछि हुन सक्ने अवाञ्छित घटना अनुसन्धान गर्न विज्ञ सम्मिलित स्वतन्त्र अनुसन्धान समिति कार्यरत रहेको र सो समिति राष्ट्रिय खोप कार्यक्रममा समावेश भएका सबै खोपबाट हुनसक्ने अवाञ्चित घटनाको अनुसन्धान गर्ने भनी प्रष्टीकरण दिइएको छ ।
