पर्सामा भन्सार छली गरेर ल्याइएको १२ लाख बढीको औषधि बरामद

वीरगन्ज—प्रहरी कार्यलय पर्साले भन्सार छली गरेर ल्याइएको अनुमानित १२ लाख रुपैयाँ बढीको औषधि बरामद गरेको छ । सोमबार पर्सा प्रहरीले पर्सा विन्दवासिनी गाउँपालिका—४ मधवल सडकखण्ड हुँदैं अवैध रुपमा भित्र्याउन लागिएको अनुमानित १२ लाख ७८ हजार रुपैयाँको औषधि बरामद गरेको हो ।

पर्सा प्रहरीका प्रवक्ता प्रहरी नायब उपरीक्षक किशोर लम्सालकाअनुसार उक्त औषधि पर्सा विन्दवासिनी गाउँपालिका—४ मधवल सडकखण्डको बाटो हुँदैं भन्सार छली चोरी पैठारी गरेर वीरगन्जतर्फ ल्याउँदैं गरेको अवस्थामा पक्राउ गरिएको हो ।

प्रहरीले उक्त औषधि बोकेको ना.५ च २४८३ नम्बरको पिकअप गाडीका समेत नियन्त्रणमा लिएको छ । चोरी पैठारी गरिएको औषधि भित्र्याउन लागेको बाराको जितपुर सिमरा उपमहानगरपालिका—५ बस्ने २४ वर्षीय सुनिलकुमार राम पनि पक्राउ परेका छन् ।

पक्राउ परेका राम र बरामद गरिएको औषधि थप अनुसन्धानका लागि सोमबार नै वीरगन्ज भन्सार कार्यलयमा बुझाइएको प्रहरीले जनाएको छ ।