नेपाल नर्सिङ संघले भन्यो, ‘नर्सहरुलाई दुई दिने सार्वजनिक विदाबाट बञ्चित गर्न पाइने छैन’

काठमाडौं—नेपाल नर्सिङ संघले नर्सहरुलाई दुई दिने सार्वजनिक विदाबाट बञ्चित गर्न नपाइने जनाएको छ । आइतबार संघकी अध्यक्ष प्रा. चन्द्रकला शर्मा र महासचिव डा. देवकाकुमारी आचार्यले संयुक्त विज्ञप्ती जारी नर्सलाई दुई दिन विदा दिनु न्यायोचित भएको समेत बताएकी छन् ।

संघले शनिबार र आइतबार विदा दिने सरकारको निर्णयलाई स्वागत गरेको छ । ‘सम्पूर्ण स्वास्थ्य संस्थामा कार्यरत नर्सहरुलाई शारीरिक तथा मानसिक स्वास्थ्यका लागि दुई दिन विदा दिनु न्यायोचित हुन्छ,’ संघले भनेको छ, ‘नर्सिङ जनशक्ति अभावको बहानामा नर्सहरुलाई उक्त दुई दिनको सार्वजनिक विदाबाट बञ्चित गर्न पाइने छैन ।’

नेपाल नर्सिङ संघले तोकिएको विदा उपलब्ध गराउन नसकिने भएमा आवश्यक परेको जनशक्ति व्यवस्थापन गरी सेवा तथा विदाको अनुपात मिलाउन स्वास्थ्य तथा जनसंख्या मन्त्रालय र सरोकारवाला निकायसँग जोडदार माग गरेको छ ।