काठमाडौं—स्वास्थ्य तथा जनसंख्यामन्त्री निशा मेहताले स्वास्थ्यका ७ जना उच्च अधिकारीहरुको जिम्मेवारी हेरफेर गरेकी छन् । बुधबार मन्त्रीस्तरीय निर्णय गर्दै उनले ११ औं तहका सात जना उच्च अधिकारीहरुको जिम्मेवारी फेरबदल गरेकी हुन् ।
मन्त्री मेहताले मन्त्रालयअन्तर्गतका निकायहरुमा रहेर काम गरिरहेका तीन जना उच्च अधिकारीहरुलाई मन्त्रालयमा भित्र्याएकी छन् । चार जना उच्च अधिकारीहरुलाई मन्त्रालयको जिम्मेवारीबाट हटाएर संघीय अस्पताल र प्रयोगशाला पठाएकी छन् ।
राष्ट्रिय तालिम केन्द्रकी निर्देशक यशोदा अर्याल, इपिडिमियोलोजी तथा रोग नियन्त्रण महाशाखाका प्रमुख डा. रोशन न्यौपाने र डा. गुणानिधी शर्मालाई मन्त्रालयमा ल्याएकी छन् । सम्भवतः बिहीबार उनीहरूको महाशाखा टुंगो लाग्नेछ ।
यसअघि मन्त्रालयको नीति, योजना तथा अनुगमन महाशाखाका प्रमुख रहेका डा. चुमनलाल दासलाई नारायणी अस्पताल फिर्ता पठाइएको छ । उनको दरबन्दी सोही अस्पतालमा हो । तर, गत माघदेखि काजमा मन्त्रालयको नीति तथा योजना महाशाखा प्रमुखका रुपमा कार्यरत थिए ।
गुणस्तर मापन तथा नियमन महाशाखाका प्रमुख डा. सरोज शर्मालाई पनि वीर अस्पताल पठाइएको छ । डा. शर्मा पनि काजमै मन्त्रालयमा थिए ।
स्वास्थ्य मन्त्रालयको समन्वय महाशाखामा रहेका भीम सापकोटालाई पनि मन्त्रालयबाट सरुवा गरिएको छ । उनलाई हेटौडास्थित कीटजन्य प्रयोगशालामा पठाइएको छ ।
यसैगरी, स्वास्थ्य बीमा बोर्डका कार्यकारी निर्देशक रहेका डा. कृष्ण पौडेलको काज फिर्ता गरेर गजेन्द्रनारायण सिंह अस्पतालमा पठाइएको छ । तर, स्वास्थ्य बीमा बोर्डमा कार्यकारी प्रमुख नभएकाले उनलाई केही समय त्यही काम गर्न भनिएको छ ।
