प्रधानमन्त्री ओलीलाई एपेन्डिसाइटिस, शल्यक्रियाको तयारी

काठमाडौं—पेटमा समस्या देखिएपछि उपचारका महाराजगञ्जस्थित मनमोहन कार्डियो थेरासीस एण्ड भास्कुलर सेन्टर पुगेका प्रधानमन्त्री केपी शर्मा ओलीलाई एपेन्डिसाइटिसको समस्या देखिएको छ ।

प्रधानमन्त्रीलाई एपेन्डिसाइटिस देखिएपछि शल्यक्रियाको तयारी भैरहेको छ । प्रधानमन्त्रीका स्वास्थ्य सल्लाहकार प्रा.डा. अरुण सायमीले प्रधानमन्त्रीलाई एपेन्डिसाइटिस भएको पुष्टि गरे । ‘उहाँलाई एपेन्डिसाइटिस भएको रहेछ,’ डा. सायमीले भने, ‘शल्यक्रिया गर्ने तयारीमा छौं ।’

उनका अनुसार सम्बन्धित सबै किसिमका विशेषज्ञ चिकित्सकहरुको टोली शल्यक्रियाका लागि तयार भएको छ । प्रधानमन्त्री ओली एक्कासी पेट दुखेपछि मंगलबार बिहान अस्पताल गएका थिए ।