म्याड्रिड (स्पेन)—विश्वको प्रतिष्ठित क्यान्सर विज्ञ सञ्जालमध्ये एक युरोपियन सोसाइटी फर मेडिकल अंकोलोजी (ईएसएमओ)ले सन् २०२६ को ‘लिडरसिप एन्ड करियर डेभलपमेन्ट अवार्ड’का लागि विश्वभरबाट २८ जना उदीयमान क्यान्सर विशेषज्ञ छनोट गरेको छ । उक्त सूचीमा दुई जना नेपाली क्यान्सर विशेषज्ञ परेका छन् ।
सूचीमा विराट मेडिकल कलेज टिचिङ हस्पिटलका डा. विवेक घोष र पाटन स्वास्थ्य विज्ञान प्रतिष्ठानकी डा. रजनी झा परेका हुन् । २३ देखि २७ अक्टोबरसम्म म्याड्रिडमा सम्पन्न ईएसएमओ कंग्रेसमा उनीहरूलाई सम्मानित गरिएको हो ।
‘विश्वका अग्रणी क्यान्सर केन्द्रहरूका प्रतिभासँग प्रतिस्पर्धा गरेर क्यान्सरको बढ्दो भार, सीमित स्रोत र अनुसन्धानका कम अवसर भएको नेपालजस्तो देशका दुई युवा चिकित्सकले यो मान्यता पाउनु हाम्रो स्वास्थ्य क्षेत्रका लागि ऐतिहासिक क्षण हो,’ सूचीमा परेकामध्ये एक डा. विवेक घोषले भने ।
डा. विवेकले एम्स नयाँदिल्लीबाट स्नातकोत्तर गरेका छन् र क्यानाडाको क्यान्सरकेयर मनिटोबा तथा युनिभर्सिटी अफ मनिटोबाबाट एडभान्स्ड रेडिएसन अंकोलोजी फेलोसिप पूरा गरेका छन् । विदेशमा आर्जेको ज्ञानलाई स्वदेशमै प्रयोग गर्दै उनी पूर्वी नेपालमा गुणस्तरीय क्यान्सर उपचार विस्तार गर्न लागिपरेका छन्।
डा. रजनीले बंगबन्धु शेख मुजिब मेडिकल युनिभर्सिटी (बीएसएमएमयू), ढाकाबाट अंकोलोजी रेसिडेन्सी पूरा गरेकी हुन् । उनी क्लिनिकल अभ्यासमा संलग्न हुँदै नेपाली समुदायमा क्यान्सरबारे जनचेतना फैलाउन सक्रिय रहनुका साथै देशभर क्यान्सर सेवाको पहुँच बढाउन सक्रिय छन् ।
यो पुरस्कारले उपलब्ध गराउने नेतृत्व तालिम, अनुसन्धान विकास र अन्तर्राष्ट्रिय सहकार्यको अवसरलाई उनीहरूले स्थानीय तथ्याङ्कमा आधारित अध्ययन, प्रमाणमा आधारित उपचार र राष्ट्रिय क्यान्सर नियन्त्रण नीतिको सुधारमा लगाउने लक्ष्य राखेका छन् ।
