कोरोना अपडेट : मेडिकल काउन्सिलद्वारा अस्पताल र स्वास्थ्यकर्मीलाई सचेत रहन आग्रह

काठमाडौं – नेपाल मेडिकल काउन्सिलले नोवेल कोरोना भाइरस (२०१९-nCov)को जोखिम उच्च उच्च जोखिम रहेको भन्दै अस्पताल तथा स्वास्थ्यकर्मीलाई सतर्कता अपनाउन आग्रह गरेको छ। चीनसँग नेपालको भौगोलिक निकटता तथा आवात-जावतलाई मध्यनजर गर्दा भाइरसको संक्रमण नेपालमा ज्यादा हुने सम्भावना भएको जनाउदै काउन्सिलले सोमबार सतर्कताको सूचना जारी गरेको हो।

नोबेल कोरोना भाइरस शंका लागेमा अलग्गै कोठामा राखेर उपचार गर्नेदेखि सरकारी निकायलाई जानकारी गराउनेसम्मका कुराहरु उक्त सूचनामा उल्लेख छ । काउन्सिलले असम्बन्धित व्यक्तिको आगमन नियन्त्रण र स्वास्थ्यकर्मीको सेक्युरिटीलाई समेत महत्वका साथ सूचनामा उल्लेख गरेको छ ।

कोरोना भाइरसको संक्रमण दिनानुदिन बढ्दै गएपछि विश्व स्वास्थ्य संगठनले गत शुक्रबार ‘ग्लोबल इमर्जेन्सी’ घोषणा गरेको थियो। अहिलेसम्म कोरोना भाइरसबाट मृत्यु हुनेको संख्या २ सय १३ पुगेको छ भने ९ हजार ६ सय ९२ जना यसबाट संक्रमित छन् ।