चीनबाट ल्याइएका १ सय ७५ नेपालीको नमुना परीक्षण आजबाट

काठमाडौं—चीनको हुबेई प्रान्तका विभिन्न सहरबाट उद्धार भएर आइतबार बिहान नेपाल आइपुगेका नेपाली नागरिकहरुको संकलित नमुना सोमबारबाट परीक्षण गरिनेछ । राष्ट्रिय जनस्वास्थ्य प्रयोगशालाकी निर्देशक डा. रुना झाले बुधबार मात्रै नमुना परीक्षणको रिपोर्ट आउने बताइन् ।

नमुना परिक्षण सम्पन्न हुन तीन दिन अर्थात बुधबारसम्म लाग्नेछ । स्वास्थ्य मन्त्रालयले भने प्रारम्भिक जाँच २४ घण्टाभित्र र अन्तिम पटक १४ दिनमा गर्ने स्पष्ट पारेको थियो । नमुना परिक्षणमा हुने ढिलाइले दुई हप्ता भनिएको क्वारेन्टाइन कम्तीमा पनि तीन दिन लम्बिने भएको छ ।

सरकारले चीनबाट ल्याएका नेपाली नागरिकहरुका लागि क्वारेन्टाइन सम्बन्धी कार्ययोजना—२०७६ जारी गरेको छ । चीनबाट उद्धार गरी ल्याएका १७५ जनाको सोही कार्यविधी योजनाअनुसार क्वारेन्टाइन अवधिभर स्वास्थ्य उपचार हुनेछ ।  स्वास्थ्य मन्त्रालयले पनि उपचारमा केन्द्रित भएर कार्यविधि बनाएको छ ।