नेपाल मेडिकल कलेजको शल्यक्रिया कक्षमा संक्रमण फैलियो

काठमाडौं—अत्तरखेलस्थित नेपाल मेडिकल कलेज (एनएमसी) शिक्षण अस्पतालमा शल्यक्रिया कक्षमा संक्रमण फैलिएको छ । प्रसुती कक्षमा शल्यक्रिया गर्दा दुई दिनमा तीन जनामा संक्रमण फैलिएको हो ।

तीन जनामै एउटै समस्या देखिएको थियो पिसाव नहुने । अस्पताले भने सलाइनपानीमा आशंका गरेको छ । विभिन्न अस्पतालमा फैलिएको संक्रमणलाई ध्यानमा राख्दै अस्पतालले सलाइनपानीका कारण यस्तो भएको अनुमान लगाएको छ ।

गत आइतबार एक र सोमबार दुई जनामा संक्रमण भएको अस्पतालका निर्देशक डा राजेशकिशोर श्रेष्ठले बताए । चिकित्सकहरुका अनुसार एन्टिबायोटीक र सलाइनपानी गुणस्तर नभएको खण्डमा पनि संक्रमण फैलन्छ ।

सलाइनपानी, एन्टिवायोटीक, इन्जेक्सन, अन्य औषधी वा अरु नै केही कारणले संक्रमण फैलिएको भन्ने बारेमा अनुसन्धान भइरहेको अस्पतालले जनाएको छ । डा. राजेशकिशोर श्रेष्ठले एकबाट दुई हुँदै संक्रमण बढ्न थालेपछि संवेदनशीलतालाई मध्यनजर गर्दै शल्यक्रिया रोकेको बताए ।