रेडियोग्राफी क्षेत्रका मागप्रति स्वास्थ्य मन्त्रालय सकारात्मक

काठमाडौं—नयाँ संगठन तथा व्यवस्थापन सर्वेक्षण (ओएनएम) संशोधन गरेर रेडियोग्राफी क्षेत्रका मागहरु संशोधन गर्न स्वास्थ्य तथा जनसंख्या मन्त्रालय सकारात्मक देखिएको छ । बिहीबार मन्त्रालय स्वास्थ्य सचिव डा. विकास देवकोटालगायतका अधिकारीसँग भएको छलफलमा ओएनएम संशोधन गर्न सकारात्मक धारणा प्राप्त भएको सरकारी रेडियोग्राफी संघ नेपालका अध्यक्ष दामोदार रोक्का जानकारी दिए ।

रकारी रेडियोग्राफी संघ नेपाल र नेपाल रेडियोलोजिकल सोसाइटीको अगुवाइमा गरिएको शान्तिपूर्ण आन्दोलनपछि रेडियोग्राफी क्षेत्रका मुख्य मागहरू ओएनएम संशोधनमार्फत समावेश गरिने निश्चित भएको उनले बताए ।

बिहीबार स्वास्थ्य तथा जनसंख्या मन्त्रालयमा सम्पन्न औपचारिक संवादमा स्वास्थ्य सचिव डा. विकास देवकोटा, सहसचिव भीमप्रसाद सापकोटालगायत मन्त्रालयका उच्च अधिकारीहरूको उपस्थिति रहेको थियो। रेडियोग्राफी क्षेत्रको तर्फबाट सरकारी रेडियोग्राफी संघ, नेपाल र नेपाल रेडियोलोजिकल सोसाइटीका अध्यक्षहरू तथा महासचिवहरूले सहभागिता जनाएका थिए ।