काठमाडौं—बुढानिलकण्ठ—५ मा भएको निःशुल्क आँखा शिविरमा १ सय १२ जनाले निःशुल्क सेवा लिएका छन् । शनिबार बीएम फाउन्डेसनले ताइवान प्रिभेन्ट ब्लाइन्डनेस फाउन्डेसन तथा बुढानीलकण्ठ नगरपालिका— ५ को सहयोगमा बुढानीलकण्ठ–५ मा निःशुल्क सामुदायिक आँखा परीक्षण शिविर सञ्चालन गरेको थियो ।
उक्त शिविरमा ७६ पुरुष र ३६ महिलासहित कुल ११२ जनाले निःशुल्क आँखा परीक्षण सेवा लिएका थिए । सहभागीहरूमध्ये अधिकांश ज्येष्ठ नागरिक रहेको बीएम फाउण्डेसनका प्रमुख डा. बुद्धिमान श्रेष्ठले जानकारी दिए । उनकाअनुसार यसले समुदायमा सहज र पहुँचयोग्य आँखा उपचार सेवाको आवश्यकता अझ बढ्दो रहेको संकेत गरेको छ ।
परीक्षणका क्रममा २४ जनामा परिपक्व तथा अपरिपक्व मोतियाबिन्दुको समस्या पहिचान गरिएको थियो । यसका साथै ड्राइ आई सिन्ड्रोम, पिङ्ग्युकुला, कन्जङ्क्टिभाइटिस तथा अन्य सामान्य आँखासम्बन्धी समस्याहरू पनि फेला परेका थिए ।
थप उपचार आवश्यक पर्ने सेवाग्राहीलाई आवश्यक परामर्श प्रदान गर्नुका साथै उपयुक्त स्वास्थ्य संस्थामा रेफर गरिएको डा. श्रेष्ठले जानकारी दिए ।
उनकाअनुसार शिविरको मुख्य उद्देश्य समयमै आँखा सम्बन्धी रोगको पहिचान गरी रोकथाम योग्य अन्धोपन न्यूनीकरण गर्नुका साथै स्थानीय समुदायलाई गुणस्तरीय आँखा उपचार सेवामा सहज पहुँच उपलब्ध गराउनु रहेको थियो ।
