काठमाडौं—बजारमा छ्याप छ्याप्ती नक्कली पशु औषधि पाइन थालेपछि व्यवसायीहरु चिन्तित बनेका छन् । सीमामा कडा नियमनको अभाव र भेटनरी औषधिमाथि नियांमक निकायको नियमन कडा नहुँदा बजारमा नक्कली भेट औषधिहरु बढेपछि किसानहरु पनि ठगिने सम्भावना बढेर गएको छ ।
अग्रणी भेट डिस्ट्रीब्युटर्स कम्पनी कान्तिपुर भेट डिस्ट्रीब्युटर्स प्रा.लि.ले नक्कली औषधिबाट बच्न किसानहरुलाई सार्वजनिक सूचना नै जारी गरेको छ । उसले कान्तिपुर भेट डिस्ट्रीब्युटर्स प्रा.लि.मा आधिकारिक रुपमा दर्ता भएर बिक्री वितरण गरिदैं आएको बायोभेट ज्वाइन्ट स्टक कम्पनी बुल्गेरियाद्वारा उत्पादित भेटमुलिन ८० % र भेन्कटेश्वरा ह्याचरी प्रा.लि. द्वारा उत्पादित भेनकेसिन २५ % नामक पशु औषधि नक्कली प्याकिङ गरी बजारमा अनधिकृत रुपमा बिक्री वितरण भइरहेको भन्दैं चिन्ता जाहेर गरेको छ ।
‘सम्पूर्ण विक्रेता तथा सरोकारवालाहरुलाई उक्त औषधि खरिद गर्दा आधिकारिक विक्रेता कान्तिपुर भेट डिस्ट्रिब्युटर्स प्रा.लि.सँग मिला तथा प्रमाणीकरण गरी खरिद तथा विक्री वितरण गर्न अनुरोध छ,’ कान्तिपुर भेटले भनेको छ ।
कान्तिपुरले बजारमा उपलब्ध नक्कली औषधिहरु खरिद वा विक्री तिवरण गरेमा त्यसबाट उत्पन्न हुने समस्याको सम्पूर्ण जिम्मेवारी सम्बन्धित बिक्रेता र खरिदकर्ताको हुने स्पष्ट गरेको छ ।
कान्तिपुर मात्रै होइन् अन्य भेट कम्पनीहरुका उत्पादनहरु पनि खुला सिमाको फाइदा उठाउँदैं नक्कली वा अनधिकृत रुपमा बजारमा बिक्री तिवरण भएकोमा व्यवसायीहरु चिन्ता प्रकट गरिरहेका छन् ।
