बालबालिकालाई भिटामिन ए र जुकाको औषधि खुवाउने कार्यक्रम सम्पन्न

काठमाडौँ । राष्ट्रिय भिटामिन ए कार्यक्रमअन्तर्गत राष्ट्रव्यापी रुपमा बालबालिकालाई भिटामिन ए क्याप्सुल र जुकाको औषधि खुवाउने कार्यक्रम सम्पन्न भएको छ । सोमबार दुई दिने भिटामिन ए र जुकाको औषधि खुवाउने राष्ट्रिय कार्यक्रम सम्पन्न भएको हो ।

स्वास्थ्य तथा जनसङ्ख्या मन्त्रालयले ५ वर्षमुनिका बालबालिकाको आँखाको दृष्टिलाई जोगाउने, रोग प्रतिरोधात्मक क्षमता बढाउने, कुपोषण कम गर्ने र बाल मृत्युदर घटाउने उद्देश्यले वैशाख ६ र ७ गते देशैभर ६ देखि ५९ महिनाका करिव २३ लाख बालबालिकालाई भिटामिन ए, १२ देखि ५९ महिनाका करिब २१ लाख बालबालिकालाई जुकाको औषधि र ६ देखि २३ महिनाका करिव ८ लाख बालबालिकालाई बाल भिटा खुवाउने लक्ष्य राखिएको थियो ।

अभियानलाई सफल बनाउन करिव ५० हजार महिला सामुदायिक स्वास्थ्य स्वयंसेविका तथा १५ हजार स्थानीय तहका स्वास्थ्यकर्मीहरु प्रत्यक्ष रुपमा परिचालन हुनुको साथै जनप्रतिनिधिहरु समेतको उल्लेख्य सहभागिता रहेको थियो ।