गर्मी मौसमको सुरुवातसँगै बालबालिकालाई शितलता प्रदान गर्न अभिभावकले पौडी खेल्नका लागि ‘स्वीमिङ पुल’ लैजाने क्रम बढेको छ । पछिल्लो समय गर्मी सँगै हप्तामा दुई दिन विदा हुँदा, विदाको सदुपयोग गर्नका लागि अधिकांश बालबालिकाहरु पौडी खेल्नका लागि स्वीमिङ पुल जाने गरेका छन् । विद्यालय विदाको समयमा मनोरञ्जनका लागि पौडी खेल्न लैजाँदा बालबालिकाको स्वास्थ्यमा भने विभिन्न समस्याहरू देखिन थालेका छन् ।
पछिल्लो समय अस्पतालका ओपिडीमा पौडी खेलेपछि बिरामी भएका बालबालिकाको संख्या उल्लेख्य मात्रामा बढेको छ । पौडी खेल्ने क्रममा बालबालिकाले अन्जानमै पोखरीको पानी निल्ने गर्छन् । पोखरीलाई सफा राख्न प्रयोग गरिने ‘क्लोरिन’युक्त पानीले बालबालिकाको घाँटीमा एलर्जी गराउन सक्ने र पानी फोहोर भएमा घाँटी तथा फोक्सोमा संक्रमण हुने गरेको पाइएको छ । यसका साथै कानमा संक्रमण भई कान पाक्ने वा दुख्ने समस्या पनि उत्तिकै देखिएको छ ।
यस्तै, गर्मीका कारण पौडी पोखरीमा अत्याधिक भीड हुने गरेको छ । धेरै मानिसको उपस्थितिले गर्दा पानी फोहोर हुने र संक्रमणको जोखिम झन् बढ्ने सम्भावना रहन्छ ।
संक्रमणपछि बच्चाहरूलाई घाँटी दुख्ने, टन्सिलाइटिस, कानको संक्रमण र कहिलेकाहीँ छातीमा संक्रमण भई निमोनिया पनि हुने गरेको छ । केही बच्चाहरूलाई उच्च ज्वरो आई, छारेरोग जस्तै काम्ने र कहिलेकाहीं उनीहरूलाई अस्पताल भर्ना गर्नुपर्ने समेत हुन्छ।
धेरै भीडभाड भएको पौडी पोखरीमा बालबालिकालाई लैजानु हुँदैन् । यस्तै, बालबालिकालाई एक्लै पौडी खेल्न नछोड्ने र कसैको निगरानीमा मात्र पौडी खेलाउने, पौडी खेलिसकेपछि बालबालिकालाई सफा पानीले नुहाइदिने र कानहरू राम्रोसँग पुछिदिने र घाँटी वा कानमा समस्या देखिएमा तुरुन्त चिकित्सकसँग परामर्श लिनुपर्छ ।
गर्मीबाट बच्न पौडी खेल्नु राम्रो भएतापनि स्वास्थ्यको ख्याल नगर्दा बालबालिकाहरू लामो समयसम्म बिरामी पर्नसक्ने भएकाले सावधानी अपनाउन सबै बालबालिका र अभिभावकले ध्यान दिन जरुरी छ ।
(डा. थापा ग्राण्डी अन्तर्राष्ट्रिय अस्पतालका बालरोग विशेषज्ञ हुन् ।)
