वीरगञ्जमा किटको अभाव भएपछि कोभिड–१९ परीक्षण बन्द

धनुषा–लामो समयदेखि एन्टिजेन किटको अभाव भएपछि वीरगञ्ज महानगरपालिकाले शंकराचार्य गेट नजिक स्थापना गरेको हेल्थ डेस्कमा हुँदै आएको परीक्षण प्रभावित भएको छ । दैनिक भारतबाट सो नाका भएर २५ जनाभन्दा बढी नेपाली वीरगञ्ज प्रवेश गर्ने गरेका छन् ।

तर, किटको अभावमा कोभिड–१९ परीक्षण हुन नसकेको हेल्थ डेस्कका इन्चार्ज सैमुला अन्सारीले बताए । ‘किटको अभावमा अहिले सामान्य ज्वरो मात्र नाप्ने गरिन्छ,’ उनले भने । कोभिड–१९ को लक्षण देखिएमा जुन जिल्लाको बासिन्दा हुन्छ, त्यही जिल्लामा उपचारको लागि पठाउने गरेको उनले जानकारी दिए ।

महानगरपालिकाले भन्सार क्षेत्रमा स्थापना गरेको हेल्थ डेस्कमा एन्टिजेन किटको अभाव रहेको जनाएको छ । महानगरपालिकाका प्रमुख विजय सरावगीले जिल्ला जनस्वास्थ्य कार्यालयले हालसम्म सो किट उपलब्ध नगराउँदा समस्या देखिएको बताए ।

सो हेल्थ डेस्कमा स्वाब संकलन समेत बन्द छ ।