बुटवलमा कोरोना बिरामी बढेपछि २ वटा अस्पताल कोभिड अस्पतालमा परिणत

बुटवल – रुपन्देहीमा कोभिड १९ का बिरामीलाई मौजुदा अस्पतालहरुले धान्न नसकेपछि थप दुइ वटा अस्पताललाई कोभिड अस्पतालका रुपमा परिणत गरिएको छ । रुपन्देहीमा हाल लुम्बिनी प्रादेशिक अस्पताल धागोकारखाना बुटवल, क्रिमशन अस्पताल मणिग्राम, भिम अस्पताल भैरहवा र युसिएमएस भैरहवामा उपचार भइरहेको हो ।

यी अस्पतालहरुमा कोभिड १९ का बिरामीले अत्याधिक चाप भए पछि थप २ वटा अस्पतालहरुले कोरोनाको उपचार सुरु गरेका हुन् । देवदह मेडिकल कलेज देवदह र सिद्धार्थ वाल तथा महिला अस्पताल (आम्दा) अस्पतालले कोरोना संक्रमितको उपचार सुरु गरेको छ ।

देवदह मेडिकल कलेजले एचडीयू स्तरको ५ बेड र जनरल १० बेड गरि १५ बेडको कोरोनाको उपचार सुरु गरेको छ । अस्पतालले छिट्टै ५० बेड पुर्याइने योजना बनाएको कलेजका निर्देशक डा. बिक्रम ज्ञवालीले बताए ।

सिद्धार्थ बाल तथा महिला अस्पताल (आम्दा)मा बालबालिका तथा महिलालाई लक्षित गरि एचडीयू स्तरको १० बेड सञ्चालन गरेको अस्पतालका मेडिकल सुपरिटेन्डेन्ट डा. राजेन्द्र प्रसाद बस्यालले बताए ।