ह्याण्ड सेनिटाइजरको कालो बजारी गर्ने २ जना पक्राउ

सुनसरी-अवैध रुपमा ह्याण्ड सेनिटाइजर उत्पादन तथा भण्डारण गरी कालो बजारी गर्ने २ जनालाई पक्राउ परेका छन् । मंगलबार इटहरीको मनकामना टोलमा संचालनमा रहेको सौर्य केमिकलका संचालक र अर्का एक जना कस्मेटिक पसल सन्चालक पक्राउ परेका हुन् ।

स्थानीय ३० वर्षीय अतित गुरागाईले अनुमति नलिई सौर्य नामक ह्याण्ड सेनिटाइजर उत्पादन गरेका थिए । उनले मापदण्डविपरित उत्पादन गरिएको उक्त सेनिटाइजर इटहरी-६ का ४५ वर्षीय अमर जित गोस्वामीको कस्मेटीक पसल जे.बी. इन्टप्राईजेजमा भण्डारण राखेका थिए ।

प्रहरीले उक्त अवैध सेनिटाइजरसहित दुवै जनालाई पक्राउ गरेको हो । उक्त स्थानबाट प्रहरीले स्तर घटाई उत्पादन गरी विभिन्न प्लाष्टिकका बोतलहरुमा लेवल टाँसी बजार मूल्यभन्दा वढी मुल्यमा बेचबिखन गर्न तयार गरिएका ३० एमएलका १७७० वटा प्लाष्टिकका बोतलहरु बरामद गरेको हो ।

यसैगरी वाग्मती लेखिएको हरियो वाल्टिनमा रहेको सेतो तरल पदार्थ १६२ लिटर र १५०० खाली वट्टा तथा ९५ बण्डल स्टिकर समेत प्रहरीले बरामद गरेको छ । पक्राउ परेका सेनिटाइजर उत्पादक र विक्री वितरण गर्ने दुवै जनालाई पक्राउ गरी कालो वजार तथा केही अन्य सामाजिक अपराध तथा सजाय ऐन २०३२ वमोजिम म्याद थप गरेको छ । उनीहरुमाथि थप अनुसन्धान जारी रहेको इलाका प्रहरी कार्यालय इटहरीले जनाएको छ ।