विराटनगर – सुनसरीको धरानस्थित विपी कोइराला स्वास्थ्य विज्ञान प्रतिष्ठानको कोभिड अस्पतामा बेथिति बढेपछि प्रदेश १ को सामाजिक विकास मन्त्री जीवन घिमिरेले अस्पतालाई चुस्त दुरुस्त राख्न पदाधिकारीहरूलाई निर्देशन दिएका छन् । कोभिड अस्पतालमा बेथिति बढेको भन्दै मन्त्री घिमिरले बिहीबार निरीक्षण गर्दै अस्पतालका पदाधिकारीहरूलाई यस्तो निर्देशन दिएका हुन् ।
कोभिड-१९ अस्पताल संचालन भएको ४ महिनामानै उपकरणहरु विग्रिनुको कारण र कोरोनाका गम्भिर प्रकारका विरामीहरुले कोभिड अस्पतालमा उपचार नपाउनुको कारणबारे मन्त्री घिमिरेले जानकारी लिए । उनले प्रतिष्ठानका कमजोरीहरु तत्काल सुधार गर्न पदाधिकारीलाई निर्देशन दिए ।
सुनसरीका प्रमुख जिल्ला अधिकारी फणिन्द्रमणी पोखरेलले प्रतिष्ठानको कोभिड १९ अस्पताल संचालन भएको ४ महिनामानै कसरी भेन्टिलेटर विग्रियो भनेर प्रतिष्ठानका पदाधिकारीहरुलाई प्रश्न राखे ।
प्रतिष्ठानको कोभिड अस्पताल जहाँ धरानको मात्रै होइन प्रदेश र प्रदेश बाहिरका गम्भिर प्रकृतिका विरामीले उपचार पाउनु पर्नेमा पछिल्लो समय उपचार नपाईरहेको गुनासो आएको भन्दै प्रमुख जिल्ला अधिकारी पोखरेलले प्रतिष्ठानको बेतिथिको बारेमा प्रश्न उठाएका थिए ।
बैठकमा प्रमुख जिल्ला अधिकारी पोखरेलले बुँदागतरुपमा डेढ दर्जन जति सुझावहरु प्रतिष्ठानका पदाधिकारीहरुलाई दिएका छन् । सामाजिक विकास मन्त्रीसंगै प्रतिष्ठानमा मन्त्रालयका सचिव, प्रदेश ल्याब प्रमुख, स्वास्थ्य महाशाखा प्रमुखको सहभागिता रहेको थियो । बैठकमा प्रतिष्ठानको धर्मशालालाई आइसोलेसनबाट पुरै कोभिड अस्पतालको रुपमा विकास गर्नेबारे पनि छलफल भएको बताईएको छ ।
अक्सिजन प्लान्ट निर्माणको प्रक्रिया अघि बढीसकेको र चाँडै पुरा हुने उपकुलपति डा. ज्ञानेन्द्र गिरीले जानकारी दिए । कोभिड अस्पतालको ९ वटा भेन्टिलेटर मध्ये ५ वटा चलिरहेको र बाँकी ४ वटा विग्रिएकोले मर्मत भइरहेको प्रतिष्ठानका सहप्रवक्ता डा. आशिष श्रेष्ठले बताए ।
