विषादी सेवन गरेका बिरामीको कोशी अस्पतालमा मृत्यु

विराटनगर—‘अर्गानो फोसफरस’ नामक विषादी सेवन गरेको कारण विराटनगरस्थित कोशी अस्पतालमा उपचारको क्रममा एक जना बिरामीको मृत्यु भएको छ ।

मोरङको जहदा गाउँपालिका–४ का ६० वर्षीय दिनेश मण्डलको उपचारको क्रममा मृत्यु भएको उपचारमा संलग्न कोशी अस्तपाल विराटनगरका फिजिसियन डा. डेनप्रसाद आचार्यले जानकारी दिए ।

पारिवारिक विवादपछि मण्डलले शनिबार राति १० बजेतिर विषादी सेवन गरेपछि कोशी अस्पताल ल्याइएको थियो । ‘विषादी सेवन गरेका बिरामीको स्वास्थ्य जटिल बन्दै गएपछि हामीले आईसीयुमा राखेर उपचार सुरू गरेका थियौं,’ उपचारमा संलग्न डा. आचार्यले भने, ‘बिरामी मण्डलको मुटुको चालमा गडबड हुदै गयो । विष मार्ने औषधी चलिरहेको थियो । हामीले उपचार गर्दा गर्दै उहाँलाई बचाउन सकिएन ।’

उपचारकै क्रममा उनको सोमबार बिहान ८ बजेतिर मृत्यु भएको अस्पतालका मेडिकल सुपरिटेन्डेन्ट डा. चुमनलाल दासले जानकारी दिए ।