विराटनगर–मोरङको विराटनगरस्थित न्यूरो हस्पिटलको विस्तारित शाखा मदर एण्ड चाइल्ड अस्पतालमा भर्ना भएकी उदयपुरकी कोभिड–१९ संक्रमित महिलाको शल्यक्रिया सफल भएको छ ।
एक्कासी पेट दुःखेपछि उदयपुरको विभिन्न अस्पतालमा उपचार असम्भव भएपछि सोमबार एम्बुलेन्समार्फत विराटनगरस्थित मदर एण्ड चाइल्ड अस्पतालमा ल्याएर भर्ना गरिएकी २९ वर्षीया महिलाको मंगलबार दिउँसो शल्यक्रिया सफलतापूर्वक सम्पन्न भएको हो ।
कोभिड–१९ संक्रमित रहेकी ती महिलाको एक्कासी पेट दुख्दा अस्पताल ल्याएपछि जाँच गर्दा एपेन्डिक्सको समस्या देखिएपछि सफल शल्यक्रिया गरिएको मदर एण्ड चाइल्ड अस्पतालका प्रशासन शाखा प्रमुख अजित बस्नेतले जानकारी दिए । अस्पतालका वरिष्ठ सर्जन डा. अभिशेक चौधरीको टोलीले शल्यक्रिया गरेको हो । अहिले महिलाको स्वास्थ्य अवस्था सामान्य छ ।
मदर एउण्ड चाइल्ड अस्पतालमा भर्ना भएकी सो महिलाको कोरोना परीक्षण गर्दा रिपोर्ट पोजिटिभ आएपछि विभिन्न सावधानीहरु अपानाएर शल्यक्रिया गरिएको हो । सर्जन डा. चौधरीका अनुसार सबै सुरक्षाको उपाय अपनाएर ती महिलाको शल्यक्रिया गरिएको हो । ‘कोरोनासँग डराएर बिरामीको उपचार रोक्नु हुँदैन,’ उनले भने, ‘हामीले पनि उच्च सतर्कता अपनाउँदै उनको उपचार गरेका हौं ।’
उनकाअनुसार बिरामीको समयमै सफल शल्यक्रिया भएपछि सम्भावित दुर्घटनाबाट बचेको हो । चिकित्सक, नर्स तथा स्वास्थ्यकर्मीले सबै सुरक्षाको उपाय अपनाउँदै शल्यक्रिया गरिएको हो ।
यता उनकी श्रीमान विकास भट्टराईले अन्य अस्पतालहरुले कोभिडको बिरामी भन्ने बितिकै नछुने र अलग्गै लगेर राख्ने भएपनि मदर एण्ड चाइल्ड अस्पतालले दिन रात केही नभनी सफल शल्यिक्रया गरिदिएकोमा कृतज्ञता व्यक्त गरे । ‘अन्य धेरै अस्पतालमा गएमा कोभिड बिरामीको नाम सुन्ने बितिकै पर-परै रहने भएपनि यहाँ चाहिँ बिरामी र कुरुवा अस्पताल प्रशासनले गरेको व्यवहारप्रति खुसी छु,’ उनले भने ।
