विराटनगर—अन्तर्राष्ट्रिय महिला दिवसको अवसर पारेर विराटनगरस्थित न्यूरो हस्पिटलले एक महिनासम्म उपचारमा छुट योजना ल्याएको छ । हस्पिटलले फागुन १७ देखि चैत १७ गतेसम्म स्वास्थ्य उपचार सेवामा छुट योजना ल्याएको हो ।
मंगलबार हस्पिटलले पत्रकार सम्मेलन गरी मार्च ८ मा पर्ने अन्तर्राष्ट्रिय महिला दिवसको अवसर पारेर छुट योजनासहित सचेतनामूलक अभियानको कार्यक्रम पनि गर्दै आएको अस्पतालका अपरेशनल डाइरेक्टर राजेश भट्टराईले जानकारी दिए । सम्पूर्ण महिलाहरुको सम्मानका लागि महिना भरी प्रसूती तथा स्त्री रोगको ओपीडी सेवा निःशुल्क गरिएको छ । प्रसुती तथा स्त्री रोग ओपीडी सेवाको जाँचमा २५ प्रतिशत छुट रहेको रहेको छ ।
वरिष्ठ स्त्री तथा प्रसूती रोग विशेषज्ञ तथा अस्पतालका मेडिकल डाइरेक्टर समेत रहेकी प्रा.डा. शैलजा क्षेत्री (श्रेष्ठ) र डा.निशा अधिकारी रहेकी छिन् ।
अस्पतालले पाठेघरको मुख सम्बन्धी क्यान्सरको जाँच पनि निःशुल्क गर्ने भएको छ । प्याप स्मियर जाँच र कोल्पोस्कोपी जाँच पनि हुनेछ । हस्पिटलले स्तन क्यान्सर सम्बन्धी परामर्शको साथै सचेतना कार्यक्रम पनि गर्ने मेडिकल डाइरेक्टर प्रा.डा. शैलजा क्षेत्री श्रेष्ठले बताइन् ।
‘महिलाहरूमा हुने स्तन क्यान्सरको सुरुवाती पहिचान कसरी गर्ने भन्ने विषयमा पनि सचेतना तथा परामर्श र जाँच गरिनेछ,’ डा. शैलजाले भनिन्, ‘महिलाहरुमा यस्तो समस्या देखा पर्न थालेको छ । स्वास्थ्य सचेतना जोगाउन जरुरी रहेको छ ।’ अहिले एकदमै बाँझोपनको समस्या पनि बढदै गएको उनले बताइन् । निकट भविष्यमा न्यूरोले आईभिएफ सेवा पनि सुचारु गर्ने तयारीमा रहेको छ ।
यस्तै, हस्पिटलले मानसिक स्वास्थ्य सम्बन्धी परामर्श दिने भएको छ । महिला स्वास्थ्य सम्बन्धी हेल्थ प्याकेजहरुमा पनि विशेष छुटको व्यवस्था गरिएको हस्पिटलले जनाएको छ । एक महिनासम्म निःशुल्क सेवा लिने महिलाहरुको परिवारका सदस्यहरुलाई पनि विभिन्न स्वास्थ्य सेवाहरुमा छुटको व्यवस्था गरिने हस्पिटलले जनाएको छ ।
७५ प्रतिशतभन्दा बढी महिला कर्मचारी रहेको हस्पिटलले ६ वर्षदेखि अन्तर्राष्ट्रिय महिला दिवसको अवसरमा स्वास्थ्य सेचतना कार्यक्रम गर्दै आएको छ । अस्पतालका कार्यकारी निर्देशक अनिशा विष्टको नेतृत्वमा अस्पतालले व्यवसायिक प्रतिवद्धतामा मात्र नभएर सामाजिक उत्तरदायित्वमा पनि आफुलाई अग्रपंक्तिमा उभ्याएको हस्पिटलले बताएको छ ।
