विराटनगर– कोशी प्रदेशको राजधानी रहेको सहर विराटनगरमै बालवालिकाहरुमा कुपोषण देखिएको छ । विराटनगर महानगरपालिकाको एउटै वडामा ३३ जनामा कुपोषण देखिएको हो ।
बालस्वास्थ्य शिविरमा परीक्षण गराउन ल्याइएकामध्ये २२ जनामा कडा कुपोषण र ११ जनामा मध्यम कुपोषण देखिएको विराटनगर–१९ बैजनाथपुर अस्पतालका सिनियर अहेव भोला तिम्सिनाले जानकारी दिए । उनका अनुसार शिविर कार्यक्रममा पाँच वर्षमुनिका ४४८ जना बालबालिकाको स्वास्थ्य परीक्षण भएको थियो । जसमध्ये ३३ जनामा कुपोषण देखिएको हो ।
परीक्षणमा आएकामध्ये दुईजना बालबालिका अन्य समस्या भएको पाइएको थियो । उनीहरुको उपचारका लागि मोरङ सहकारीमा भर्ना गरिएको थियो ।
विराटनगर महानगरपालिकाको बाल स्वास्थ्य विशेष कार्यक्रम अन्तर्गत पाँच वर्षमुनिका बालबालिकाको स्वास्थ्य परीक्षण तथा पोषण लेखाजोखा शिविर सुरु गरिएको छ । गत शुक्रबार विराटनगर–१९ मा यो शिविर सम्पन्न भएको थियो ।
सिनियर अहेव तथा अस्पतालका प्रमुख तिम्सिनाका अनुसार शुक्रबार शिविर सञ्चालन गरेर स्वास्थ्य परीक्षणमा छुटेकाहरु आइतबार सम्पर्कमा आएका थिए । आइतबार २२ जना बालबालिकामध्ये चारजनामा मध्यम कुपोषण आशंका गरिएको छ ।
शिविरमा सहभागी गराइएका बालबालिकाको कुनैपनि स्वास्थ्य समस्या देखिएमा विराटनगर महानगरपालिकाले निःशुल्क उपचार गर्नेछ । शिविरमा कडा र मध्यम कुपोषण देखिएकाहरुलाई निरन्तर रुपमा घरमै पुगेर थप परीक्षण गर्ने कार्यक्रम समेत रहेको छ ।
कुपोषण देखिएका बालबालिकाका अभिभावकलाई परामर्श दिइनेदेखि बच्चाका लागि पोषण प्याकेजसमेत उपलब्ध गराइएको तिम्सिनाले जानकारी दिए । अब कडा र मध्यम कुपोषण देखिएका बालबालिकाको लागि घरमै दुध तथा अण्डाको प्रवन्ध मिलाएर दैनिक थप आहारको जोहो गर्ने कार्यक्रमसमेत रहेको छ ।
अतिविपन्न परिवारमा जन्मिएका बालबालिका धेरै कुपोषणको शिकार देखिएका हुन् । विराटनगर महानगरपालिकाले एक गैरसकारी संस्थामार्फत यो कार्यक्रम सञ्चालन गर्न सम्झौता गरेको छ । बालबालिकाको उमेर अनुसारको उचाई र तौल नभएको अवस्थामा उनीहरुमा कुपोषण रहेको मानिन्छ । त्यसका लागि विराटनगर महानगरपालिकाले एकीकृत बालस्वास्थ्य शिविर १९ नम्बर वडाबाट सुरु गरेर सबै वडामा सेवा विस्तार गर्ने तयारी गरेको छ ।
