२०८१ साउन ७, सोमबार
Health Aawaj logo
गृहपृष्ठप्रदेश १विराटनगरको रानी नाकामा हेल्थ डेस्क संचालनका लागि निर्मित नयाँ भवनबाट सेवा सुरू

विराटनगरको रानी नाकामा हेल्थ डेस्क संचालनका लागि निर्मित नयाँ भवनबाट सेवा सुरू

नेपाल प्रवेश गर्ने व्यक्तिहरूको स्वास्थ्य परीक्षण गरिने


विराटनगर—नेपाल–भारत सीमावर्ती क्षेत्र रानी नाकामा निर्माण गरिएको भवनबाट स्वास्थ्य सेवा सञ्चालनमा ल्याइएको छ । जोगबनी नाकाबाट नेपाल प्रवेश गर्ने व्यक्तिहरूसँगै संक्रामक रोग पनि भित्रिने जोखिम भएका कारण नवनिर्मित भवनबाट नियमित चेक जाँच सुरु गरिएको हो ।

अन्तर्राष्ट्रिय स्वास्थ्य मापदण्डअनुसार हरेक प्रमुख नाकामा हेल्थ डेस्कको व्यवस्था गर्नुपर्ने हुन्छ । जसअन्तर्गत नेपाल सरकारको नीतिअनुसार विराटनगर महानगरपालिकाले रानी नाकामा यसअघिदेखि नै महामारी नियन्त्रणका लागि हेल्थ डेस्क सञ्चालनमा ल्याएको थियो । विगतमा भवन नहुँदा टेन्टमार्फत सेवा सञ्चालन हुँदै आएको थियो ।

नेपाल सरकारले राज्यका प्रमुख नाकामा स्वास्थ्य सहायता कक्ष सञ्चालन गरी यात्रुहरूको स्वास्थ्य परामर्श, परीक्षण, निदान वा प्रेषण सेवामार्फत संक्रामक रोगको नियन्त्रण र निवारणमा सहयोग पुग्ने विश्वास लिइएको छ । हाल पनि स्वास्थ्य सहायता कक्षमार्फत एचआईभी, एड्स, क्षयरोग, मलेरिया (औलो), कोभिडलगायतका संक्रामक रोगलाई प्राथमिकतामा राखेर चेकजाँच जारी राखिएको स्वास्थ्य महाशाखाका संयोजक डा. दिलीप यादवले जानकारी दिए ।

उनका अनुसार नियमित र एकीकृत रुपमा कोभिड–१९, एचआईभी, क्षयरोग तथा औलोको परीक्षण र प्रारम्भिक उपचार हुनेछ ।

महानगरका प्रमुख प्रशासकीय अधिकृत राजेन्द्र पराजुली, विराटनगर वडा नम्बर १६ का अध्यक्ष उद्धव भुजेल, मोरङका प्रहरी प्रमुख एसपी नवराज कार्कीलगायतको उपस्थितीमा भएको उद्घाटन कार्यक्रममा मेयर नागेश कोइरालाले नाकामा सुविधासम्पन्न भवन नहुँदा विगतमा स्वास्थ्य चेक जाँचमा समस्या देखिँदै आएको बताए । उनले अब भवन निर्माण भएसँगै नेपाल प्रवेश गर्ने व्यक्तिहरूको नियमित चेकजाँच गरिने जानकारी दिए । मेयर कोइरालाले जनशक्तिसहित स्वास्थ्य उपकरण व्यवस्था गरिने बताए ।

स्वास्थ्य अधिकृत रमेश कार्कीले भविष्यमा आउन सक्ने महामारी नियन्त्रणमा नवनिर्मित हेल्थ डेस्कमार्फत समयमै संक्रमित व्यक्तिहरूको पहिचान गरी क्वारेन्टाइन तथा अस्पतालहरूमा उपचार गराउन सकिने जानकारी दिए । जसबाट अन्य व्यक्तिहरूमा संक्रमण हुनबाट जोगाउने उनको भनाइ छ ।

१८ वैशाखमा निर्माण सुरु भएको भवन २० असारमा सम्पन्न भएको थियो । महानगरपालिकाको २० लाख रुपैयाँ र सेभ द चिल्ड्रेनको १५ लाख ७६ हजार लागतमा निर्माण गरिएको भवनको चावी स्वास्थ्य तथा जनसंख्या मन्त्रालय तथा प्रदेश सरकारका प्रतिनिधिको उपस्थितीमा सेभ द चिल्ड्रेन ग्लोबल फण्ड कार्यक्रमका प्रमुख दीपक पौडेलले मेयर कोइरालालाई हस्तान्तरण गरे । सेभ द चिल्ड्रेन ग्लोबल फण्डले महोत्तरीको जलेश्वर नगरपालिका मलिवारा भिट्टामोडमा समेत हेल्थ डेस्कका लागि भवन निर्माण गरेको पौडेलले जानकारी दिए ।


क्याटेगोरी : प्रदेश १



तपाईको प्रतिक्रिया दिनुहोस


ट्रेण्डिङ