कोशी अस्पतालमा ईआरसीपी सेवा सुरू, चिरफारबिनै पित्तनलीको ढुंगा निकालिने

विराटनगर—कोशी अस्पतालले पित्तनलीमा रहेको ढुंगा शल्यक्रिया नगरी निकाल्न सकिने अत्याधुनिक ईआरसीपी (ERCP) सेवा सुरु गरेको छ । नयाँ सेवा सुरु भएसँगै पूर्वी नेपालका बिरामीले पित्तनलीको ढुंगाको उपचारका लागि निजी अस्पताल वा भारत धाउनुपर्ने बाध्यता कम हुने अपेक्षा गरिएको छ ।

अस्पतालले हालै ईआरसीपी प्रविधिमार्फत पहिलो बिरामीको सफल उपचार गरेको हो। मोरङको डाइनिया घर भएका ५५ वर्षीय हमिर आलमको पित्तनलीमा रहेको ढुंगा यो प्रविधिबाट निकालिएको अस्पतालले जनाएको छ ।

पेट तथा कलेजो रोग विशेषज्ञ डा. भुवनेश्वर यादवका अनुसार ईआरसीपीमा मुखबाट इन्डोस्कोपीको माध्यमले सानो आन्द्रा (डिउडेनम) सम्म पुगेर पित्तनलीमा रहेको ढुंगा वा अन्य अवरोध हटाइन्छ । बिरामीलाई बेहोस बनाएर गरिने यो प्रक्रिया सामान्य इन्डोस्कोपीभन्दा केही जटिल र अत्याधुनिक रहेको उनले बताए ।

‘मेसिनलाई सानो आन्द्रासम्म पुर्‍याएर त्यहाँबाट पित्तनलीमा प्रवेश गराई ढुंगा निकालिन्छ,’ डा. यादवले भने ।

परम्परागत उपचारमा पेट चिरेर शल्यक्रिया गर्नुपर्ने भएकाले बिरामीलाई अस्पतालमा लामो समय बस्नुपर्ने अवस्था हुन्थ्यो । ईआरसीपीबाट भने शल्यक्रिया नगरी उपचार गर्न सकिने भएकाले जटिलता, समय र खर्च कम हुने चिकित्सकको भनाइ छ । ‘जटिलता नदेखिए उपचारकै दिन बिरामीलाई डिस्चार्ज गर्न सकिन्छ,’ डा. यादवले भने, ‘यसले बिरामीको समय र खर्च दुवै बचत गर्छ ।’

कोशी अस्पतालमा पहिलो पटक ईआरसीपी गरिएका आलममा पित्तनली र पित्तथैलीमा संक्रमण (कोलेन्जाइटिस) समेत देखिएको थियो । उपचारपछि चिकित्सकीय निगरानीमा एक दिन राखेर उनलाई बुधबार डिस्चार्ज गरिएको अस्पतालले जनाएको छ। हाल उनको स्वास्थ्य अवस्था सामान्य र स्थिर रहेको छ ।

नयाँ प्रविधिबाट प्रभावकारी उपचार पाएको भन्दै आलमले खुसी व्यक्त गरेका छन् । उनले उपचारमा संलग्न चिकित्सक तथा स्वास्थ्यकर्मीप्रति आभारसमेत व्यक्त गरे ।

ईआरसीपी सेवा सञ्चालनमा डा. यादवको नेतृत्वमा सर्जन डा. रवि बस्ताकोटी, डा. रविनाथ सिंह, एनेस्थेसियाका चिकित्सक तथा डा. मोहन खड्कालगायतको टोली संलग्न रहेको अस्पतालले जनाएको छ ।