कोरोनाबाट मृत्यु भएका वृद्धको परिवारका ५ जनासहित ७ जनामा कोरोना पुष्टि, अन्यको पनि हिस्ट्री खोजिदैं

जनकपुर—सप्तरीमा मृत्यु भएका कोरोना संक्रमित वृद्धका परिवारका सदस्यसहित पसलमा काम गर्ने कर्मचारीमा पनि संक्रमण पुष्टि भएको छ । राजविराज नगरपालिका ६ का ७२ वर्षका संक्रमित वृद्धको गत बिहीबार राति धरानस्थित विपी कोइराला स्वास्थ्य विज्ञान प्रतिष्ठानमा मृत्यु भएको थियो ।

मृत्युपछि वृद्वको परिवारका सदस्य र पसलमा काम गर्ने कर्मचारी गरी १९ जनाको स्वाब संकलन गरी परीक्षणका लागि पठाइएको थियो । त्यसमध्ये राजविराजस्थित उनको पसलमा काम गर्ने एक पुरुष र उनको कम्प्युटर मर्मत गर्न गएका एक पुरुष पनि संक्रमण देखिएको छ । सोमबार बिहान उनीहरुको रिपोर्ट पोजेटिभ आएको वडा अध्यक्ष प्रेम यादवले वताए ।

आइतबार मृतक वृद्वका श्रीमती, छोरा, बुहारी र नातिनातिना गरी ५ जनामा कोरोना संक्रमण पुष्टि भएको थियो । उनीहरुलाई घरमै आइसोलेसनमा राखिएको छ ।
वृद्धको परिवार दुई साताअघि भारतबाट घर आएको थियो । वडा अध्यक्ष यादवले भने उनको परिवार भारतबाटै संक्रमित भएर आएको देखिएको बताए । ‘उनी आएपछि को कोसँग भेटे भन्ने सन्दर्भमा हिस्ट्री खोजी भैरहेको उनले बताए ।