चिकित्सकको गाडीको ठक्करबाट घाइते भएका सुरक्षागार्डको मृत्यु

विराटनगर–विराटनगर महानगरपालिका–१३ रानीमा रहेको विराटनगर आँखा अस्पतालमा शनिबार भएको सवारी दुर्घटनामा परी घाइते भएका सुरक्षागार्डको मृत्यु भएको छ ।

विराटनगर आँखा अस्पतलाका चिकित्सक डा. निष्ठा श्रेष्ठ सवार वाग्मती प्रदेश ०१–२७ च ४०२१ नम्बरको गाडीको ठक्करबाट गेटमा खटिएका सुरक्षागार्ड विराटनगर ४ का ४५ वर्षीय गुरुप्रसाद लुइँटेल शनिबार विहान गम्भीर घाइते भएका थिए ।

अस्पतालभित्र प्रवेश गरेको गाडीले गेटमा ठक्कर दिएको थियो । ठक्करबाट भत्किएको गेटले थिचेर उनी गम्भीर घाइते भएका थिए । घाइते उनको उपचारका क्रममा साँझतिर विराटनगरस्थित न्युरो अस्पतालमा मृत्यु भएको मोरङ प्रहरी प्रवक्ता डिएसपी दीपक श्रेष्ठले जानकारी दिए ।

दुर्घटनापछि सवारी र सवारी चालक सर्लाहीको पर्सा गाउँपालिका–८ का ३४ वर्षीय दिनेश साहलाई नियन्त्रणमा लिएको उनले बताए । प्रहरी नियन्त्रणमा रहेका साहलाई सवारी ज्यान मुद्दमा म्याद थप गरि अनुसन्धान सुरु गर्ने मोरङ प्रहरीले जनाएको छ ।