नर्भिकको अवैध संरचना हटाएर छाड्ने बालेनको घोषणा

काठमाडौं—काठमाडौं महानगरपालिकाका मेयर बालेन्द्र शाहले थापाथलीस्थित नर्भिक अस्पतालले सडक मिचेर बनाएको अवैध संरचना हटाएर छाड्ने बताएका छन्। बुधबार न्यूरोडको आरबी कम्प्लेक्स परिसरमा बनेका अवैध संरचना हटाउने क्रममा व्यापारीहरुले नर्भिकको संरचना हटाउन चुनौती दिएका थिए ।

सो क्रममा मेयर शाहले नर्भिकको संरचना हटाएरै छाडने बताएका हुन् । ‘ठूलो सानो सबैलाई कानुन लाग्छ,’ उनले भने, ‘हामीले जिल्ला अदालतलाई पनि समय दिएका छौं । हामी नर्भिकका अवैध संरचना पनि हटाएरै छाडछौं ।’

यसअघि नर्भिक अस्पतालको संरचना हटाउने क्रममा सुरुमा सहमति भएपनि पछि व्यवस्थापनले सर्वोच्च अदालत गएर अन्तरिम आदेन लिएको थियो । बालेन त्यसपछि अदालतप्रति पनि आक्रोशित बनेका थिए ।