किशोरीहरुलाई पाठेघरको मुखको क्यान्सरबारे सचेतना

हेल्थ आवाज बिहीबार, २०८० असोज ११ गते, १७:३२ मा प्रकाशित

काठमाडौं—पाठेघरको मुखको क्यान्सरको बारेमा जनचेतना अभिवृद्धि गराउने उद्देश्यले ग्राण्डी इन्टरनेशनल हस्पिटलमा सचेतना कार्यक्रम सम्पन्न भएको छ । बिहीबार काठमाडौंका विभिन्न विद्यालयका कक्षा १० देखि १२ मा अध्ययनरत किशोरीहरूलाई अस्पतालका स्त्री तथा प्रसुति रोग विशेषज्ञ डा. पदमराज पन्तले पाठेघरको मुखमा हुने क्यान्सरको प्रारम्भिक निदानका महत्वबारे प्रकाश पारेका थिए ।

डा. पन्तले महिलाहरुको पाठेघरको परीक्षण गर्दा १ सय जनामा ५ जनामा पाठेघरको मुखको क्यान्सर देखिएकोले रोक्न र उपचार गर्नको लागि ग्राण्डी अस्पतालले विभिन्न स्कुल कलेज तथा स्थानीय निकायहरुसँग समन्वय गर्दै जनचेतना अभिवृद्धि गर्ने कुरामा अघि बढ्ने बताए।

समयमै पाठेघरको मुखको क्यान्सर थाहा पाए उपचार गर्न सकिन्छ र यसको जानकारी भए रोकथामसमेत गर्न सकिन्छ भन्ने जानकारी आवश्यक भएको बताए। गाउँदेखि सहरसम्म जनचेतना जगाउनु आवश्यक रहेको बताउँदैं डा. पन्तले विकसित देशमाभन्दा अल्पविकसित देशमा यो रोग बढ्दै गएको बताए ।

उनले पाठेघरको क्यान्सर पत्ता लगाउन महंगो नभएको र कम खर्चमा गर्न सकिने भएकोले मुख्य कुरा सबैलाई चेतना फैलाउनु आवश्यक भएको बताए ।