जिप्रका दैलेख कार्यालयमै सेवाग्राहीको स्वास्थ्य परीक्षण

वीरेन्द्रनगर—जिल्ला प्रशासन कार्यालय दैलेखले कार्यालयमा नै स्वास्थ्य परीक्षण कक्ष सञ्चालनमा ल्याएको छ । मंगलबारबाट सेवाग्राहीका लागि प्रशासन कार्यालय परिसरमै सेवाग्राहीको स्वास्थ्य परीक्षण गर्नका लागि स्वास्थ्य कक्ष सञ्चालनमा ल्याइएको हो ।

कार्यालयमा सेवा लिन आउनेहरूले दिउँसो १२ बजेदेखि २ बजेसम्म स्वास्थ्य परीक्षण कक्षबाट सेवा लिन सक्ने प्रमुख जिल्ला अधिकारी खिमराज भुसालले बताए । ‘स्वास्थ्य परीक्षण कक्षका लागि जिल्ला अस्पतालबाट एक स्वास्थ्यकर्मीको व्यवस्था गरिएको छ,’ उनले भने, ‘जिल्ला स्वास्थ्य कार्यालयबाट निःशुल्क औषधी समेत व्यवस्था गरिएको छ ।’

सेवाग्राहीको स्वास्थ्यलाई ध्यानमा राखेर निरन्तर सेवा दिनेगरी ‘सेवाग्राही स्वास्थ्य परीक्षण कक्ष’ सञ्चालन गरेको भुसालले बताए ।

सेवाग्राहीसँग प्रमुख जिल्ला अधिकारी कार्यक्रम प्रभावकारी बन्दैं गएको उनले जानकारी दिए । ‘सेवाग्राहीको स्वास्थ्यलाई समेत ध्यानमा राखेर सेवाग्राही स्वास्थ्य परीक्षण कक्ष सञ्चालमा ल्याएका हौं ।’