विश्व स्वास्थ्य संगठनको दक्षिण पूर्वी एसियाकी क्षेत्रीय निर्देशक डा. साइमा वाजेद निलम्बित

काठमाडौं—विश्व स्वास्थ्य संगठन (डब्लूएचओ)की दक्षिण पूर्वी एसियाकी क्षेत्रीय निर्देशक निलम्बनमा परेकी छन् । विश्व स्वास्थ्य संगठनका महानिर्देशक डा. टेड्रोस अधानोम गेब्रेयससले इमेलमार्फत क्षेत्रीय निर्देशक डा. साइमा वाजेद निलम्बन (इनडिफिनिटीभ लिभ) परेको जानकारी सदस्य राष्ट्रहरुलई दिएका छन् ।

विश्व स्वास्थ्य संगठन स्रोतकाअनुसार छानविन नटुंगिन्जेलसम्मका लागि बाजेदलाई डब्लूएचओले ११ जुलाईबाट निलम्बन गरिएको हो । उनको निलम्बनको कारण भने खुलाइएको छैन । गत जुलाई ११ मा बंगलादेशको भ्रष्टाचार विरोधी आयोग (एसीसी)ले बाजेद विरुद्ध ठगी, कागजपत्र कीर्ते र पदको दुरुपयोग सम्बन्धी मुद्धा दायर गरेको थियो । डा. वाजेदले विश्व स्वास्थ्य संगठनको क्षेत्रीय निर्देशकका लागि उम्मेदवारी दिँदा पेश गरेको शैक्षिक योग्यता पनि झुटो भएको आरोप लागेको छ ।

डा. वाजेद आफ्नी आमा शेख हसिना बंगलादेश प्रधानमन्त्री हुँदा क्षेत्रीय निर्देशक चयन भएकी थिइन् । त्यतिबेला उनीमाथि शक्तिको दुरुपयोग गरेर निर्वाचित भएको आरोप लागेको थियो ।

डा. टेड्रोसले बाजेदको निलम्बन अवधिभर काम गर्नका लागि डा. काथारीना बोहमेलाई कार्यकारी क्षेत्रीय निर्देशकका रुपमा पठाइएको जानकारी समेत गराएका छन् । उनी १५ जुलाईमा दिल्ली आइपुग्ने समेत उक्त इमेलमा उल्लेख छ ।