विराटको मुटु रोग विभागमा १६ शय्या थप

विराटनगर—मोरङस्थित विराट मेडिकल कलेज टिचिङ अस्पतालले मुटु रोग विभागको क्षमता विस्तार गरेको छ । आइतबारबाट विराटले औपचारिक रुपमा अस्पतालको दोस्रो तलामा रहेको मुटु रोग विभागमा १६ शय्या थप गरेको हो ।

विराट मेडिकल कलेज टिचिङ हस्पिटलका वरिष्ठ मुटु रोग विशेषज्ञ प्रा.डा. डा. प्रशान्त साह र मुटु रोग विशेषज्ञ डा. माधव विष्टले रिबन काटेर कोरोनरी केयर युनिट (सीसीयु)को उद्घाटन गरेका हुन् ।

सुविधा सम्पन्न मुटु रोग विभागअन्तर्गत सीसीयु सञ्चालनमा ल्याइएको अस्पतालले जनाएको छ ।

यसअघि विराटको मुटु रोग विभाग ९ शय्या सञ्चालनमा थियो । अब क्याबिनसहित १६ शय्या थपिएसँगै अस्पतालले २५ शय्या सीसीयुबाट मुटु रोगका बिरामीहरुले उपचार सेवा पाउने जनाएको छ ।