मेदान्तका अनुभवी चिकित्सकले साटे किष्ट शिक्षण अस्पतालका चिकित्सकसँग अनुभव

ललितपुर—किष्ट मेडिकल कलेज एण्ड शिक्षण अस्पताल र नयाँदिल्लीस्थित मेदान्तबीच सहकार्यात्मक क्लिनिकल तथा शैक्षिक ज्ञान आदान—प्रदान कार्यक्रम सम्पन्न भएको छ । आइतबार चिकित्सकहरुबीच अनुभव साटासाट गर्दै जटिल रोगहरुको उपचार तथा व्यवस्थापनबारे ज्ञान अभिवृद्धि गर्ने उद्देश्यका साथ उक्त कार्यक्रम सम्पन्न भएको हो ।

कार्यक्रममा मेदान्तका सिनियर निर्देशक—कार्डियो सर्जरी डा. सुरिन्द्र बजाज तथा अध्यक्ष—न्यूरो साइन्सेज डा. भी.पी सिंहको विशेष उपस्थिती रहेको थियो । डा. सुरिन्द्र र डा. भिपीले किष्टका चिकित्सकहरुसँग अन्तक्रिया गर्दै आफ्नो दीर्घ अनुभव तथा विशेषज्ञता साझा गरेका थिए ।

किष्टका १०० भन्दा बढी युवा चिकित्सकहरुको सहभागित रहेको उक्त अन्तक्रिया कार्यक्रममा क्लिनिकल केसहरुमाथि पनि संक्षिप्त छलफल गरिएको थियो । यसले चिकित्सकहरुलाई महत्वपूर्ण सिकाइको अवसर प्रदान गरेको अस्पतालले जनाएको छ ।

किष्ट मेडिकल कलेज एण्ड शिक्षण अस्पताल र मेदान्त गुणगाउँ भारतबीच केही महिनाअघि सहकार्य गर्ने सहमति भएको थियो । सोही सहमतिअनुसार टेलिमेडिसिन सेवा पनि किष्टले सञ्चालन गरिरहेको छ । जसले जटिल रोगहरुको उपचारका लागि भारत जानुपर्ने बिरामीको बाध्यतालाई कम गर्ने अपेक्षा अस्पतालको छ ।