शहीद मेमोरियल अस्पतालद्वारा दुर्घटनामा घाइते रिजालको निःशुल्क उपचार

काठमाडौं—कलंकीस्थित १०० शय्याको शहीद मेमोरियल अस्पतालले एक जना दुर्घटनाका घाइते बिरामीको निःशुल्क उपचार गरेको छ । अस्पतालले धादिङको निलकण्ठ नगरपालिका—५ का कृष्ण रिजालको निःशुल्क उपचार गरेको अस्पतालका प्रमुख कार्यकारी अधिकृत (सिईओ) समीर शर्माले जानकारी दिए ।

‘उहाँ आर्थिक अभावका कारण उपचार गर्न सकिरहनु भएको थिएन्,’ सिईओ शर्माले भने, ‘हामीले निःशुल्क रुपमा सम्पूर्ण उपचार सेवा उपलब्ध गराएका हौं । यो हामीले अस्पतालको सामाजिक उत्तरदायित्वअन्तर्गत गरेका हौं ।’

रिजाल चार वर्षअघि भएको दुर्घटनामा गम्भीर घाइते भएका थिए । त्यतिबेला उनको हात र खुट्टाको शल्यक्रिया गरेर स्टील राखिएको थियो । जसमा समस्या देखिएपछि उनले आर्थिक अभावमा उपचार गर्न सकेका थिएनन् ।

अस्पतालले रिजालले आर्थिक समस्याका कारण उपचार गराउन नसक्ने अवस्था रहेको र विपन्न र असहाय बिरामी भएकाले उनको निःशुल्क उपचार गरिदिएको सिईओ शर्माले बताए ।