कोशी अस्पतालमा स्वास्थ्यकर्मीको मोबाइल चोर्दाचोर्दै युवक पक्राउ

विराटनगर—विराटनगरस्थित कोशी अस्पतालमा कार्यरत स्वास्थ्यकर्मीको मोबाइल चोर्दाचोर्दै एक युवक रंगे हात पक्राउ परेका छन् । बुधबार दिउँसो
अस्पतालको ओपीडी भवनको पहिलो तलामा रहेको प्रयोगशालामा खटिएकी एक महिला स्वास्थ्यकर्मीको आइफोन चोरी गर्दैगर्दा उदयपुरका २५ वर्षीय प्रेम विक पक्राउ परेका हुन् ।

मोबाइल हात पारेर भाग्नै लाग्दा अस्पतालका कर्मचारीहरूले उनलाई फेला पारेर नियन्त्रणमा लिएका थिए । पक्राउ परेका विकलाई तत्काल अस्पताल परिसरमै रहेको प्रहरी बिटको जिम्मा लगाइएको थियो ।

अस्पताल प्रशासनकाअनुसार उनलाई थप अनुसन्धान र कानुनी कारवाहीका लागि वडा प्रहरी कार्यालय विराटनगर पठाइएको छ ।

अस्पतालमा बिरामी र स्वास्थ्यकर्मीको भिडभाड हुने समयमा सामान चोरी हुने गुनासो आउने गरेकोमा बुधबार युवक रंगे हात समातिएका हुन् ।