काठमाडौं—चिकित्सा विज्ञान राष्ट्रिय प्रतिष्ठान (न्याम्स) वीर अस्पतालले रेजिडेन्ट चिकित्सकहरूको २४ घण्टे ड्युटी सम्बन्धी व्यवस्थामा परिवर्तन गरेको छ । सोेमबार न्याम्सका सहायक डिन प्रा.डा. विकासविक्रम सिंह अधिकारीले परिपत्र गर्दै रेजिडेन्ट चिकित्सकहरुको २४ घण्टा ड्युटीपछि विहानको राउण्डपछि छुट्टी दिन निर्देशन दिएका हुन् ।
यसअघि न्याम्समा ड्युटीमा रहेका रेजिडेन्ट चिकित्सकहरूले दैनिक ३६ घण्टासम्म ड्युटी गर्नुपर्थ्यो भने आवश्यकताअनुसार उनीहरू त्योभन्दा बढी समयसमेत काममा खटिनुपर्ने अवस्था थियो।जसले रेजिडेन्ट चिकित्सकहरुमाथि तीब्र कार्यबोझको दबाब थियो ।
न्याम्सको पछिल्लो निर्णयले रेजिडेन्ट चिकित्सकमाथिको कार्यबोझ कम हुनेछ । ‘यस प्रतिष्ठानमा अध्ययनरत रेजिडेन्ट चिकित्सकहरुको २४ घण्टा ड्युटीपश्चात विहानको राउण्ड सकिएपछि छुट्टी गरिदिन हुन यो परिपत्र गरिएको व्यहोरा जानकारी लागि अनुरोध गर्दछु,’ डा. अधिकारीले एमडी/एमएस/एमडिएस र डिएम/एमसीएच कार्यक्रमका संयोजकहरुलाई जारी गरेको परिपत्रमा छ ।
न्याम्सको यो निर्णय रेजिडेन्ट चिकित्सकहरूको कार्यसमय र कार्यबोझबारे भइरहेका बहसकाबीच सार्वजनिक भएको छ । यसअघि नेपाल मेडिकल काउन्सिलले पनि रेजिडेन्ट चिकित्सकहरुमाथि तीब्र कार्यबोझ रहेको भन्दैं उनीहरुलाई अनिवार्य आराम दिन प्रतिष्ठान, मेडिकल कलेज र विश्वविद्यालयहरुलाई निर्देशन दिएको थियो ।
यस्तै, वैज्ञानिक ड्युटी आवर लागु गर्नुपर्ने माग गर्दै न्याम्सका रेजिडेन्टहरुले पनि पटक—पटक माग गर्दै आएका थिए ।
