बाँकेमा एम्बुलेन्स दुर्घटना, चार जना घाइते

वीरेन्द्रनगर । बाँकेको बैजनाथ गाउँपालिका–१, हात्तिसारस्थित रत्न राजमार्गमा एम्बुलेन्स दुर्घटना हुँदा चालकसहित चार जना घाइते भएका छन्।

मंगलबार रुकुमपश्चिमबाट नेपालगञ्जतर्फ जाँदै गरेको भे.१ च ३६५ नम्बरको एम्बुलेन्स अन्य सवारीसाधनलाई साइड दिने क्रममा अनियन्त्रित भई सडकछेउको नालामा पल्टिएको प्रहरीले जनाएको छ।

दुर्घटनामा एम्बुलेन्स चालक रुकुमपश्चिमको चौरजहारी नगरपालिका–५ निवासी ३४ वर्षीय दिपेश ढकालसहित एम्बुलेन्समा सवार चौरजहारी नगरपालिका–१० निवासी २७ वर्षीय मदन बुढा, ३६ वर्षीया सुनिता रेग्मी र ७२ वर्षीया लिलावती बुढा घाइते भएका छन्।

जिल्ला प्रहरी कार्यालय बाँकेका अनुसार घाइतेहरूलाई उपचारका लागि कोहलपुर मेडिकल कलेज पठाइएको छ। चालकसहित सबै घाइतेको अवस्था मध्यम रहेको प्रहरीले जनाएको छ।