काठमाडौं—प्रधानमन्त्री कार्यालयले त्रिशूली–३ ‘ए’ जलविद्युत् आयोजनाको सुरुङभित्रबाट उद्धार गरिएका दुई जनामध्ये एक जनाको अवस्था सामान्य र एकजनाको जटिल रहेको जनाएको छ । शुक्रबार विहान फेसबुकमार्फत प्रधानमन्त्री कार्यलयले उक्त जानकारी दिएको हो ।
‘रसुवाको भोटेकोशी नदीमा आएको भीषण बाढीपछि त्रिशूली–३ ‘ए’ जलविद्युत् आयोजनाको सुरुङभित्रबाट उद्धार गरिएका दुई जनामध्ये एक जनाको अवस्था सामान्य छ भने अर्का व्यक्तिको अवस्था जटिल रहेको छ,’ प्रधानमन्त्री कार्यालयले भनेको छ ।
जटिल अवस्थामा रहेका व्यक्ति दोस्रो पटक उद्धार गरिएका कवीर महर्जन रहेको र उनलाई अगाडि नै छाउनी ल्याएर वीरेन्द्र सैनिक अस्पतालमा भर्ना गरी सघन उपचार जारी राखिएको प्रधानमन्त्री कार्यालयले जनाएको छ ।
यस्तै, सुरुमा उद्धार गरिएका सञ्जय साहको अवस्था भने सामान्य रहेको छ । स्वास्थ्य अवस्था स्थिर देखिएतापनि थप परीक्षणका लागि उनलाई पनि छाउनीस्थित वीरेन्द्र सैनिक अस्पतालमै ल्याइँदैछ।
नेपाली सेनाको नेतृत्वमा नेपाल प्रहरी, सशस्त्र प्रहरी बल र अन्य विज्ञहरुको संयुक्त टोलीले शुक्रबार बिहानै उनीहरु दुई जनाको उद्धार गरेको हो।
आयोजनाभित्र मानिसहरु फसेको आशंकापछि बाढी गएलगत्तै लगातार उद्धारको प्रयास गरिएको थियो।
