कोरोना महाव्याधिको अहिलेको परिस्थितीमा हरेकले अनेकौं समस्याको सामना गर्नु परिरहेको छ । यो समस्या केवल एक देशको लागि मात्र नभएर सम्पूर्ण विश्वकै लागि साझा चुनौती बन्न पुगेको छ । कोरोना कहरका कारण व्यक्तिको दिनचर्यामा पनि निकै नै ठूलो परिवर्तन आएको छ ।
जसकारण नियमित पार्लर गएर आफ्नो सौन्दर्यको देखभाल गर्ने दिदीबहिनीलाई पनि सकस परेको छ । त्यस्ता दिदी बहिनीहरुका लागि आज म कसरी घरमै बसेर ‘फेस क्लीन अप’ गर्न सकिन्छ । यो किन आवश्यक छ । यसको महत्व के छ ?
फेस क्लिजिङका महत्व
हामी सबैलाई सफा, सुन्दर र आकर्षक अनुहारको इच्छा हुन्छ । आफ्नो अनुहारको छालामा कुनै पनि समस्या नदेखि यो सदैव चम्किलो रहोस् भन्ने नै सबैको चाहना हुन्छ । नियमित क्लिजिङ गर्नाले छालामा नमी आई अनुहारमा भएका अनावश्यक फोहोर ब्ल्याक हेडस हटेर अनुहारको छाला उज्यालो, चम्किलो र समस्यारहित हुन जान्छ ।
अनुहारको नियमित स्याहार–सुसार गर्नेमा कहिल्यै पनि अन्य बाहिरी समस्या देखा पर्दैन् । अनुहार सदैव स्वस्थ नै देखिन्छ । तसर्थ, घरमै बसेर कसरी अनुहारलाई प्रक्रियागत रुपमा सफा गर्न वा ‘क्लीन–अप’ गर्न सकिन्छ भन्ने कुरा तल उल्लेख गरिएको छ । जसले घरमै बसेर पनि उक्त विधिद्वारा अनुहारमा चमक ल्याएर समस्यारहित बनाउन सहयोग पुग्छ ।
१. क्लिजिङ
अनुहारलाई उज्यालो र चम्किलो देखाउनको लागि क्लिजिङको आवश्यकता पर्छ । फेस क्लिजिङको लागि ‘फेस–क्लिन्जर’ वा ‘फेस–वास’ को पनि प्रयोग गर्न सकिन्छ । तर, यदि घरमा यी दुवै छैन भने यसका विकल्पको रुपमा काँचो दुध अथवा घ्युकुमारीको चोप, काँक्रो र गोलभेडाको रसको पनि प्रयोग गर्न सकिन्छ ।
यसबाहेक पाकेको मेवा केराबाट पनि हामीले फेस क्लिजिङ गर्न सक्छौं । यदि अनुहार चिल्लो स्वरुपको छ भने त्यस्ता व्यक्तिले काँक्रो वा गेलभेडाको रसले क्लिजिङ गर्दा उचित नतिजा प्राप्त गर्न सकिन्छ । करिब ६ मिनेटसम्म क्लिजिङ गरेपछि सफा पानीले मुख धुनुपर्छ । यस समयमा तातोपानीको प्रयोग भने गर्नु हुँदैन ।
२. स्क्रबिङ
क्लिजिङ गरिसकेपछि स्क्रबिङ पनि गर्नुपर्छ । यसले अनुहारमा भएका मृत कोषिकालाई निकालेर नयाँ कोषिकाको निर्माण गर्दछ । साथै यसले छालाको भित्री रुपमा अर्थात् ‘डिप–क्लिजिङ’ समेत गर्छ । जसले अनुहारमा थप चमक ल्याउनुका साथै छालालाई स्वस्थ पनि राख्दछ । स्क्रब गर्दा प्याकको रुपमा स्क्रबलाई २/३ मिनेट सम्म अनुहारमा लगाउने ।
त्यसपछि केही समय औलाको माध्यमबाट हल्का मसाज गरिसकेपछि सफा पानीले विस्तारै पखाल्नुपर्छ । स्क्रबलाई ५ मिनेटभन्दा बढी मसाज गर्नुहुँदैन । यदि हामीसँग घरमा रेडिमेड स्क्रब छैन भने यसका लागि घरमै उपलब्ध गहुँ, चामल वा मकैको पिठोमा अलिकति बेसार मिसाएर पनि स्क्रब गर्न सकिन्छ । चिनी र महको मिश्रणबाट पनि स्क्रब तयार गर्न सकिन्छ । अत्यन्त संवेदनशील डन्डिफोर भएको छालामा स्क्रब गर्नु उचित रहँदैन् ।
३. टोनिङ
स्क्रब गरेपछि अनिवार्य रुपमा टोनिङ पनि गर्नुपर्छ । अन्य सामाग्रीजस्तै टोनरलाई पनि घरमा उपलब्ध सामाग्रीको माध्यमबाट पनि तयार गर्न सकिन्छ । जसका लागि काँक्रो, गोलभेडा तथा पुदिनाको रसको मिश्रण बनाएर वा गुलाब जलमा काँक्रोको रस मिसाएर पनि तयार गर्न सकिन्छ ।
टोनिङ हाम्रो छालाको लागि अत्यन्त आवश्यक रहन्छ । यसले हाम्रो छालको पिएचलाई ब्यालेन्समा राख्नुको साथै छालालाई टोन पनि प्रदान गर्दछ । सँगसँगै यसले छालाको ओपन पोरलाई पनि कम गर्दै छालामा एन्टी–ब्याक्टेरियलको समेत काम गर्दछ ।
४. मोस्चराइजर
यति गरिसकेका पनि अन्त्यमा घाँटीदेखि नोरिसङ क्रिम लगाउनुपर्छ । माथिका सबै प्रक्रिया अपनाइसकेपछि अनुहारमा मोस्चराइजर गर्न बिर्सिनु हुँदैन । मोस्चराइजर गर्दा ड्राई स्कीन हुनेले अल्कोहलरहित मोस्चराइजर प्रयोग गर्नुपर्छ भने ओइली फेस भएकाले अल्कोहल बेस वा लोसनको प्रयोग गर्नुपर्छ ।
मोस्चराइजरले छालामा थप नमी प्रदान गर्दै केही हदसम्म चाउपरीपनालाई समेत कम गर्दछ । यी बाहेक अनुहारमा चमक यथावत राखी राख्नका लागि दैनिक प्रशस्त पानीको सेवन गर्नुपर्छ ।
