जाजरकोटको भेरीमा डेङ्गीको प्रकोप बढ्दै

वीरेन्द्रनगर– जाजरकोटको भेरी नगरपालिकामा डेङ्गीको प्रकोप बढेको छ । भेरी नगरपालिकाको वडा नम्बर ९, ११, १२ र १३ मा डेङ्गीको प्रकोप फैलिएको हो ।

जिल्लामा एक सय जना डेङ्गी परीक्षण गर्दा ६५ जना नयाँ सङ्क्रमित भेटिएको भेरी नगरपालिकाका जनस्वास्थ्य निरीक्षक तथा जिल्ला स्वास्थ्य सेवा व्यवस्थापक दीपक वलीले बताए । ‘जिल्ला अस्पताल जाजरकोटमा पनि १५ जना डेङ्गीका बिरामी फेला परेका छन् ।’ उनले भने,‘उपचारमा संलग्न चार जना स्वास्थ्यकर्मी र दुई जना वडाध्यक्षलाई समेत डेङ्गी सङ्क्रमण भएको छ ।’

कुदु क्षेत्रमा पानीको निकै समस्या हुने स्थान भएको र त्यहाँका बासिन्दाले आकासे पानी सङ्कलन गरेर प्रयोग गर्ने गर्दछन् । सोही सङ्कलित पानीमा डेङ्गी सार्ने मच्छडले फुल र लार्भा निकालिरहेका  तर पनि स्थानीयले उक्त पानी फाल्न नचाहनाले प्रकोप बढ्दै गएको स्वास्थ्यकर्मीको भनाई छ ।