२० वर्षीया मायाले बाटोमै छोरी जन्माइन्

वीरेन्द्रनगर—रूकुम पूर्वको सिस्ने गाउँपालिका—१ की एक महिला बाटोमै सुत्केरी भएकी छन् । शुक्रबार सुत्केरी ब्यथाले च्यापेपछि पैदल हिडेर सिस्ने स्वास्थ्य चौकी आउँदै गर्दा सिस्ने १ लाम्माखाकी २० वर्षीया माया बुढाले पाखापानी भन्ने ठाउँ बाटोमै छोरीलाई जन्म दिएकी हुन् ।

बुढाले दोस्रो सन्तान जन्म दिएको हुन् । उनलाई सिस्ने स्वास्थ्य चौकीबाट गएका स्वास्थ्यकर्मीले बाटोमै सुत्केरी गराएका थिए । बाटोमै सुत्केरी व्यथाले च्यापेको खबर पाएपछि सिस्ने स्वास्थ्य चौकीका इन्चार्ज काशीराम ओली स्ट्रेचर लिएर गएका थिए ।

बाटोमै सुत्केरी भएपश्चात् स्वास्थ्यकर्मीसहितको टोलीले आमा र शिशुलाई बोकेर स्वास्थ्य चौकी पु¥याएको वडा सचिव चन्द्रदेव खड्काले बताए । उनका अनुसार आमा र शिशुको अवस्था सामान्य रहेको छ । २४ घण्टाको निगरानी पश्चात् आमा र शिशुलाई डिस्चार्ज गरिएको बताए ।

सिस्ने गाउँपालिका वडा नम्बर १ सडक सञ्जालमा जोडिन सकेको छैन । एउटा मात्र स्वास्थ्य संस्था रहेको यस वडामा स्वास्थ्य संस्था पुग्न घण्टौं पैदल हिड्नुपर्ने बाध्यता रहेको छ । जिल्ला अस्पताल रूकुमकोट पुग्न १ देखि २ दिनसम्म पनि पैदल हिड्नुपर्ने बाध्यता छ ।