लकडाउन वैशाख ३ गतेसम्म, निजी अस्पतालका डाक्टरले सरकारी अस्पतालमा सेवा गरेमा सरकारले सुविधा दिने

काठमाडौँ – सरकारले जारी लकडाउनलाई वैशाख ३ गतेसम्म थप गर्ने निर्णय गरेको छ। सोमबार दिउँसो बसेको मन्त्रिपरिषदको बैठकले यस्तो निर्णय गरेको हो।

सरकारले सम्भावित कोभिड १९ को संक्रमण फैलिन नदिन चैत्र ११ गते देखि मुलुकमा लकडाउन लागु गरेको थियो। १८ चैत्रसम्मका  लागि घोषणा गरेको उक्त लकडाउनलाई चैत्र १७ गते बढाएर चैत्र २५ सम्म पुर्याइएको थियो। मंगलबार सकिने उक्त अवधिलाई सरकारले सोमबार नै बढाएर वैशाख ३ गतेसम्म पुर्याएको  हो।

यस्तै सोमबारको मन्त्रिपरिषदको बैठकले कोभिड १९ संक्रमित उपचारमा खटिने निजी अस्पतालका कार्यरत चिकित्सक पनि सरकारी अस्पतालमा आएर काम गरेको खण्डमा सरकारी चिकित्सक सरह सेवा सुविधा दिने निर्णय गरेको सरकारका प्रवक्ता समेत रहेका अर्थ एवम संचार तथा सुचना प्रविधि मन्त्री डा युवराज खतिवडाले जानकारी दिए। उनले कोभिडको उपचार तथा नियन्त्रणमा खटिने स्वास्थ्य स्वयमसेविकाहरुलाई १५ सय रुपैयाँ प्रोत्साहन स्वरूप भत्ता उपलब्ध गराउने निर्णय भएको बताए।