आरडीटी पोजेटिभ देखाएको भन्दै स्वास्थ्य संयोजकमाथि ढुंगामुढा  प्रहार

धनगढी-बाजुराको हिमाली गाउँपालिका-५ कवाडीको क्वारेन्टाइनमा बसेकाहरुले आरडीटी परिक्षण गर्न गएका स्वास्थ्यकर्मीमाथि ढुंगामुढा प्रहार गरेका छन् । भारतलगायत विभिन्न स्थानबाट घर फर्किएर वडा नं ५ को क्वारेन्टाइनमा बसिरहेकाहरुले आरडीटी रिपोर्ट पोजेटिभ आएपछि स्वास्थ्यकर्मी माथि ढुंगामुढा प्रहार गरेका हुन् ।

१४ दिन पूरा भएपछि गाउँपालिकाका स्वास्थ्य संयोजक राजबहादुर भण्डारी आफै आरडीटी टेष्ट गर्न गएका थिए । केहि व्यक्तिको आरडिटी टेष्ट गरिसकेपछि एक जना महिलाको आरडीटी रिपोर्ट पोजेटिभ आएको थियो ।

महिलाको आरडटी रिपोर्ट पोजेटिभ आएपछि किन आरडीटी रिपोर्ट पोजेटिभ निकालिस भन्दै स्वास्थ्यकर्मी माथि नै ढुंगामुढा प्रहार गरेको बुझिएको छ । प्रहार गरेको ढुंगा लागेर गाउँपालिका स्वास्थ्य संयोजक भण्डारी घाइते भएका छन् ।

भण्डारीको छातीमा गम्भीर चोट लागेपछि अहिले प्राथमिक स्वास्थ्य केन्द्र कोल्टीमा उपचार भैरहेको प्राथमिक स्वास्थ्य केन्द्रका कोभिड– १९ रोकथाम तथा नियन्त्रण समिति फोकल पर्सन ओमजंग शाहीले बताए ।