टोमोथेरापी आएको दुई वर्षमा पनि उपकरण राख्ने बंकर खाली भएन

काठमाडौँ – चिकित्सा विज्ञान राष्ट्रिय प्रतिष्ठान वीर अस्पतालले दुई वर्ष अघि खरिद गरी ल्याएको अत्याधुनिक सी.टी. सिमुलेटर र टोमोथेरापी मेसिन हालसम्म पनि जडान भएको छैन । सो मेसिन समय मै जडान नहुँदा क्यान्सरका विरामीको उपचार सेवा प्रभावित भएको छ ।

उपकरण राख्ने स्थानको टुंगो नलाग्दै खरिद गरेर ल्याएका ती उपकरण कुन र कस्तो अवस्थामा राखिएको छ ? भन्ने बारे समेत जानकारी छैन। अस्पतालले ४७ करोड ९० लाख ६० हजारमा सी.टी. सिमुलेटर र टोमोथेरापी मेसिन खरिद गरेको थियो । दुई वर्षसम्म पनि उक्त मेसिन जडान गरी गरिब बिरामीलाई स्वास्थ्य सेवा नदिएको प्रति महालेखाले प्रश्न उठाएको छ ।

अस्पतालले त्यस अघि सेवा दिँदै आएको क्यान्सरको उपचारका लागि प्रयोग गरिएको कोवाल्ट ६० रेडियो एक्टिभ सोर्सको पनि सुरक्षित व्यवस्थापन गर्न सकेको छैन । अस्पतालका निर्देशक डा. केदारप्रसाद सेन्चुरीले उपकरणका लागि ठाउँको व्यवस्थापन हुँदै गरेको बताउँछन् ।

यता, महालेखाले भने समयमै कोवाल्टको व्यवस्थापन नभएको र खरिद भएको उपकरण राख्ने बंकर खाली नगर्दा हालसम्म जडान नभएको जनाएको छ । वर्षमा ५ हजार भन्दा बढी बिरामीले क्यान्सरको रेडिएसन दिँदै आएका छन् ।