काठमाडौं—स्वास्थ्य तथा जनसंख्या मन्त्रालयले तीन किस्ता गरेर कोभिड—१९ संक्रमितको उपचार गर्ने अस्पतालहरुलाई ५९ करोड ३७ लाख ४१ हजार रुपैयाँ निकासा गरिसकेको छ । स्वास्थ्य मन्त्रालयका अनुसार असोजसम्मको सबै रकम निकासा भइसकेको छ । कात्तिक र मंसिरको रकम वितरण गरिएको छैन । त्यसका लागि अर्थमन्त्रालय समक्ष माग गरिएको मन्त्रालयका सहायक प्रवक्ता डा. समिर अधिकारीले बताए ।
कोभिड अस्पतालले बिरामी भर्ना गरेको सूचीका आधारमा रकम पाउँछन् । सोही रकमबाट अस्पतालले पीपीई, किट खरिद गर्ने मात्र होइन्, स्वास्थ्यकर्मीलाई जोखिम भत्ता पनि दिनु पर्छ । मन्त्रालयले केसअनुसारको रकम दिने भएकाले स्वास्थ्यकर्मीलाई जोखिम भत्ता दिने रकम नपुगेको अस्पतालहरुले बताएका छन् । सरकारले सामान्य संक्रमितलाई ३५ सय, लक्षणसहितका बिरामीलाई ७ हजार र आईसीयु तथा भेन्टिलेटरमा बसेका बिरामीलाई १५ हजारका दरले रकम पठाउने गरेको छ ।
चिकित्सा विज्ञान राष्ट्रिय प्रतिष्ठान (न्याम्स), वीर अस्पतालका निर्देशक डा. केदारप्रसाद सेन्चुरीले मन्त्रालयले उपलब्ध गराएको साढे चार करोडले जोखिम भत्ता र अन्य तलबमा खर्च गरेको बताए । केस अनुसारको रकम मन्त्रालयले दिएकाले सबै कर्मचारीलाई भत्ता दिन समस्या छ । अस्पतालहरुले जोखिम भत्ता दिने भन्दा पनि संक्रमितको उपचारमा लागेको खर्चबाट बचेको रकमबाट सबैलाई नियमित तलब दिएको बताएका छन् ।
पाटन अस्पतालले पनि हालसम्म स्वास्थ्यकर्मीलाई जोखिम भत्ता दिएको छैन । जोखिम भत्ताको अलावा सबै कर्मचारीलाई नियमित तलब दिइएको अस्पतालका निर्देशक डा. रवि शाक्यले बताए । कर्णाली स्वास्थ्य विज्ञान प्रतिष्ठानले असारसम्मको जोखिम भत्ता दिएको छ । तर, सतप्रतिशत दिएको छैन । परोपकार प्रसुती गृहले कात्तिकसम्मको रकम प्राप्त भएको बताएको छ । अस्पतालले जोखिम भत्ता भने तोकेअनुसार दिएको छैन । कुनै पनि कर्मचारीलाई मर्का नपर्ने गरी वितरण भएको अस्पतालले जनाएको छ ।
शहिद शुक्रराज ट्रपिकल तथा सरुवा रोग अस्पताल प्रशासन प्रमुख रुपनारायण खतिवडाले नियमित जोखिम भत्ता उपलब्ध भएको बताए । ‘असोजसम्मको वितरण भएको छ,’ उनले भने, ‘कात्तिक र मंसिरको निकासा गरिएको छैन ।’
स्वास्थ्य मन्त्रालयका सहायक प्रवक्ता डा. अधिकारीका अनुसार देशभर हालसम्म ७ हजार ६ सय ३३ स्वास्थ्यकर्मी कोरोना संक्रमित भएका छन् । उनीहरुमध्ये ७ हजार ५ सय १५ डिस्चार्ज भएका छन् । अझै ११० जना उपचाररत छन् भने ८ जनाको मृत्यु भएको छ ।
